Bugun, 6 sentyabr kuni poytaxtimiz Toshkent shahrida kurash bo‘yicha O‘zbekiston Respublikasi Prezidenti sovrini uchun I Xalqaro turnir o‘tkazilmoqda. Bahslar davomida jahonning 40 ga yaqin mamlakatidan polvonlar sovrinli o‘rinlar uchun kurash olib boradilar.
Asosiy bellashuvlar oldidan musobaqaning tantanali ochilish marosimi bo‘lib o‘tdi. Unda O‘zbekiston Respublikasi Bosh prokurori, O‘zbekiston kurash federasiyasi rahbari Otabek Murodov, Toshkent shahar hokimi Jahongir Ortiqxo‘jayev, Milliy olimpiya qo‘mitasi Prezidenti Umid Ahmadjonovlar xam ishtirok etishdi.
Tadbir davomida Otabek Murodov va Jahongir Ortiqxo‘jayevlar so‘zga chiqishdi va start olgan musobaqada ishtirok etuvchi sportchilarga omad tilashdi.
Eslatib o‘tamiz, musobaqa erkaklar o‘rtasida mutlaq vazn toifasida tashkil qilinmoqda.
Turnirning sovrin jamg‘armasi 100 000 AQSH dollarini tashkil qiladi. Birinchi o‘rin egasi 50 000 AQSH dollari miqdoridagi mukofot pulini qo‘lga kiritadi. Ikkinchi o‘rin 25 000 AQSH dollariga ega bo‘lsa, uchinchi o‘rinni band etgan polvonlar o‘z hisoblarini 10 000 AQSH dollari bilan boyitib oladilar. Shuningdek, 5-8 o‘rinni egallagan sportchilar ham 1250 AQSH dollari miqdoridagi mukofot puli bilan taqdirlanadilar.
E’tiboringizga ochilish marosimidan suratlarni taqdim etamiz:
