O‘zbekiston hamda Eron o‘rtasida kechgan o‘rtoqlik uchrashuvidan so‘ng terma jamoamiz bosh murabbiyi Ektor Kuper o‘yin haqida fikrlarini bildirib o‘tdi.

“Biz ikki xil taym guvohi bo‘ldik. Birinchi taymda biz yaxshiroq o‘ynadik. Raqib oddiy jamoa emas edi. Bu o‘yinda himoya chizig‘i va yarim himoya chizig‘i oldingi o‘yinga nisbatan yaxshiroq o‘ynadi. Xujum chizig‘i ustida ko‘proq ishlashimiz kerak.

Bu sinov o‘yini bo‘lgani sababli ko‘plab o‘yinchilarni alishtirdim va shu sabab ham ikkita taym bir biridan farq qildi. Mening taktikamdagi o‘yinda asosan himoyadan xujumga o‘tiladi. Biz juda ham kuchli jamoaga qarshi to‘p surdik. Futbolchilar mening taktikamga moslashishi uchun vaqt kerak.

Men o‘tkazilgan ikki o‘yinda jamoaning xatolari haqida yetarli xulosaga kelib oldim. Kimlar jamoada qoladi, kimlar esa ketishi haqida yaxshilab o‘ylab bir fikrga kelaman.

Osiyo kubogiga tayyorgarlik ko‘rish uchun vaqt yetarli. Buning uchun professional futbol ligasining o‘yinlarini muddatidan avval tugatish shart emas. Biz yoshlarga ham e’tibor berishni boshladik. Oktyabrdagi o‘yinlarga yoshlar terma jamoasidan o‘yinchilar chaqiriladi.

Hattoki Siz terma jamoalardagi o‘yinlarda umuman ishtirok etmagan o‘yinchilarni ham ko‘rasiz”, - deydi Kuper.