Sir emaski, sportda eng yuqori cho‘qqi Olimpiya o‘yinlari g‘olibligi hisoblanadi. Indoneziyadagi Osiyo o‘yinlari yakuniga yetgach, O‘zbekiston Tokio 2020 o‘yinlariga tayyorgarlik jarayonini boshlab yubordi. Ikki yildan so‘ng o‘tkaziladigan Olimpiya o‘yinlarida O‘zbekiston navbatdagi rekordlarni zabt etishga harakat qiladi. Bu yo‘lda keng ko‘lamdagi ishlar amalga oshiriladi. Rejalar ham katta. Jumladan, shu yilning 24 sentyabr – 7 oktyabr kunlari Milliy olimpiya qo‘mitasi turli seleksiya musobaqalarini tashkil qilmoqda.
Bugun ana shu musobaqa tashkiliy qo‘mitasining yig‘ilishi o‘tkazildi. Unda ishchi guruh a’zolari, yakkakurash sport turlari bo‘yicha federasiyalar rahbarlari ishtirok etishdi. Yig‘ilish davomida to‘rtta olimpiya sport turi – taekvondo WTF, boks, karate WKF va dzyudo bo‘yicha seleksion turnirning tashkiliy masalalari ko‘rib chiqildi.
Milliy olimpiya qo‘mitasi dasturiga ko‘ra, seleksion ochiq turnirlarida quyidagi sport turlari vakillari ishtirok etadilar:
Taekondo WTF bo‘yicha bahslarda:
Taekvondo ITF
Taekvondo GTF
An’anaviy taekvondo
O‘zbek jang san’ati
Taekvondo ITF milliy assosiasiyasi
Junri taekvondo
Musobaqaning o‘tkazilish muddati: 24-26 sentyabr
Boks:
Kikboksing
Havaskor va professional muaytay
Qo‘l jangi
Ushu-sanda
Musobaqaning o‘tkazilish muddati: 27 sentyabr – 1 oktyabr
Karate WKF:
Milliy karate
An’anaviy karate
Shotakan
Fudokan
Musobaqaning o‘tkazilish muddati: 3-4 oktyabr
Dzyudo:
Milliy kurash
Belbog‘li kurash
Jiu-jitsu
Sambo
Musobaqaning o‘tkazilish muddati: 6-7 oktyabr.
Bellashuvlar Taekvondo WTF assosiasiyasiga qarashli «Universal” sport majmuasida bo‘lib o‘tadi.
Demak, yuqorida sanab o‘tilgan sport turlaridan olimpiya yo‘nalishlariga sportchilarni seleksiya qilish uchun ushbu musobaqa tashkil qilinadi. Asosiy maqsad – Tokio 2020 musobaqasiga eng sara sportchilarni tanlab olish va yangi nomlarni kashf etishdir.
Ma’lumot uchun, Rio Olimpiadasi chempioni Hasanboy Do‘smatov ham o‘z vaqtida noolimpiya sport turi hisoblangan kikboksing bilan shug‘ullangan. To‘g‘ri yo‘lga qo‘yilgan seleksiya samarasi o‘laroq u boks terma jamoasi mashg‘ulotlarida ishtirok eta boshlagan. Yakunda esa natija qanday bo‘lganini juda yaxshi bilasiz. Ajab emaski, tashkil etilayotgan ushbu musobaqa bizga yangi Hasanboylarni kashf qilib bersa.
