6-18 oktyabr kunlari Argentina poytaxti Buenos-Ayresda III yozgi o‘smirlar Olimpiya o‘yinlari bo‘lib o‘tadi. Bundan avvalroq MOQ Argentinaga 36 nafar yosh sportimiz yo‘l olishi xaqida ma’lumot bergan edi.

Ammo Argentinaga 37 nafar sportchimiz yo‘l oladigan bo‘lgan. Bu haqda Milliy Olimpiya qo‘mitasi Matbuot xizmati ma’lum qildi.

“Bugun siz azizlar bilan navbatdagi hushxabarni baham ko‘ramiz. Ya’ni bugun Milliy olimpiya qo‘mitasiga Xalqaro havaskor bokschilar assosiasiyasi (AIBA)dan maktub keldi. Unga ko‘ra, boks bo‘yicha qizlar o‘rtasida -51 kg. vazn toifasida hamyurtimiz Xursanoy Xolmatova ham Buenos-Ayresdagi Olimpiya o‘yinlarida ishtirok etish xuquqiga ega bo‘lgan”, deya yozadi MOQ Matbuot xizmati.

Eslatib o‘tamiz, III yozgi Olimpiya o‘yinlari O‘zbekiston delegasiyasi uchun ishtirokchilar soni bo‘yicha avvalgi barcha rekordlarni yangiladi. 2010 yili Singapur mezbonlik qilgan I o‘smirlar Olimpiya o‘yinlarida O‘zbekiston 21 nafar sportchi bilan ishtirok etgan bo‘lsa, 2014 yilda Nankinda tashkil etilgan Olimpiadada O‘zbekiston delegasiyasi 28 ta sportchidan tashkil topgandi. Buenos-Ayresga esa 37 nafar sportchi bilan jo‘nab ketiladi.

“Demak, natijalar yildan yilga yaxshilanib bormoqda.Biz Argentinada medallar soni va sifati bo‘yicha ham natijalarni yaxshilash niyatidamiz. Buenos-Ayres arenalarida o‘zini har tomonlama ko‘rsatadigan sportchilarimiz nasib qilsa yana 2 yildan so‘ng Tokio 2020 Olimpiya o‘yinlarida yurtimiz sharafini himoya qilish imkoniga ega bo‘lishadi”, deya qo‘shimcha qilgan MOQ.