6-18 октябрь кунлари Аргентина пойтахти Буэнос-Айресда III ёзги ўсмирлар Олимпия ўйинлари бўлиб ўтади. Бундан аввалроқ МОҚ Аргентинага 36 нафар ёш спортимиз йўл олиши хақида маълумот берган эди.
Аммо Аргентинага 37 нафар спортчимиз йўл оладиган бўлган. Бу ҳақда Миллий Олимпия қўмитаси Матбуот хизмати маълум қилди.
“Бугун сиз азизлар билан навбатдаги ҳушхабарни баҳам кўрамиз. Яъни бугун Миллий олимпия қўмитасига Халқаро ҳаваскор боксчилар ассоциацияси (AIBA)дан мактуб келди. Унга кўра, бокс бўйича қизлар ўртасида -51 кг. вазн тоифасида ҳамюртимиз Хурсаной Холматова ҳам Буэнос-Айресдаги Олимпия ўйинларида иштирок этиш хуқуқига эга бўлган”, дея ёзади МОҚ Матбуот хизмати.
Эслатиб ўтамиз, III ёзги Олимпия ўйинлари Ўзбекистон делегацияси учун иштирокчилар сони бўйича аввалги барча рекордларни янгилади. 2010 йили Сингапур мезбонлик қилган I ўсмирлар Олимпия ўйинларида Ўзбекистон 21 нафар спортчи билан иштирок этган бўлса, 2014 йилда Нанкинда ташкил этилган Олимпиадада Ўзбекистон делегацияси 28 та спортчидан ташкил топганди. Буэнос-Айресга эса 37 нафар спортчи билан жўнаб кетилади.
“Демак, натижалар йилдан йилга яхшиланиб бормоқда.Биз Аргентинада медаллар сони ва сифати бўйича ҳам натижаларни яхшилаш ниятидамиз. Буэнос-Айрес ареналарида ўзини ҳар томонлама кўрсатадиган спортчиларимиз насиб қилса яна 2 йилдан сўнг Токио 2020 Олимпия ўйинларида юртимиз шарафини ҳимоя қилиш имконига эга бўлишади”, дея қўшимча қилган МОҚ.
