Farg‘onalik ikki nafar yosh futbolchi Ispaniya mamlakatida ko‘rikdan o‘tadi.
Bu haqida Pro-Liga “V” guruhi ishtirokchisi O‘zbekiston Yoshlar Ittifoqi vasiyligidagi “Iftixor” klubining sobiq bosh murabbiyi Islombek Ismoilov oltinvodiy.uz saytiga bergan intervyusida ma’lum qildi.
-“Farovon” futbol klubi tarbiyalanuvchilari, ya’ni sizning shogirdlaringiz xorijiy futbol klublari tarkibiga ko‘rikdan o‘tish uchun ketishayotganligi haqida eshitdik…
-YAqinda O‘zbekiston Futbol Assosiasiyasi tomonidan Ispaniyaning “Real Madrid” futbol klubi bilan xamkorlikda loyiha amalga oshirildi. Loyihada Ispaniyadan tashrif buyurgan futbol mutaxassislari viloyatlardan kelgan yosh futbolchilarni ko‘rikdan o‘tkazishdi. Ushbu jarayonda bizning “Farovon” futbol klubidan ham 6 nafar yosh futbolchilar ishtirok etishdi. Shu 6 nafar yosh futbolchilarimizdan 2 nafari A.Muxtorov va Z.Xatamjonovlar ispaniyalik mutaxassislar e’tiboriga tushdi. Ular ushbu loyiha doirasida shu oyning 28-kuni Ispaniyaning Madrid shahriga jo‘nab ketishadi. Madridda ular 10-15 kun davomida ko‘rikdan o‘tishadi. Albatta bizning “Farovon” futbol maktabidan ham shunday Yevropaning nomdor klublari tarkibida ko‘rikdan o‘tish uchun yosh futbolchilarning borishi bizni xursand qilmasdan qolmaydi. Mana shunday loyihalarni amalga oshirayotganligi uchun O‘zbekiston Futbol Assosiasiyasiga klubimiz nomidan minnatdorchilik bildiraman.
Bekzod Tolibov suhbatlashdi.
