Mana, navbatdagi yozgi transferlar bozori har tomonlama sarhisob qilinmoqda. Xususan, butun faoliyatlari davomida futbolchilar xaridiga eng ko‘p sarflagan murabbiylar reytingi ham yangilandi.
Ayni payt o‘ziga xos ushbu ro‘yxatning eng yuqori nuqtasida Joze Mourinyo turibdi. Portugaliyalik mutaxassis turli jamoalar («Portu», «Chelsi», «Inter», «Real», yana «Chelsi» va «MYU»da jami 96 nafar futbolchi xaridi uchun naq 1,52 milliard yevro sarflagan.
Xo‘sh, bu reytingda yana kimlar bor, qanday diqqatga sazovor faktlarni alohida ko‘rsatish mumkin?
* Eng serxarajat murabbiylar reytingini hamon Joze Mourinyo boshqarib turibdi. Vaholanki, «MYU» oxirgi transferlar bozorida xaridlar uchun «Benazir» o‘ylaganidan ancha kam ajratdi.
* Karlo Anchelotti faol faoliyatga qaytdi, biroq reytingdagi 2-o‘rinni yaqin orada bo‘shatib qo‘ysa kerak. Chunonchi, Xosep Gvardiolaning italiyalik hamkasbiga yetib olishi uchun atigi 50 million yevro qoldi.
* Agarda 2008 yil, ya’ni Xosep Gvardiolaning «Barselona» boshqaruvidagi ilk mavsumidan keyingi transferlarni inobatga olsak, aynan kataloniyalik mutaxassis eng serxarajat murabbiy maqomini oladi.
* Arsen Venger va Klaudio Ranyeri ayni payt ishsiz, aniqrog‘i, ular nafaqaga chiqishga yaqinlar. Roberto Manchini esa Italiya milliy jamoasi boshqaruvini qo‘lga oldi. Demakki, yaqin orada ularning transferlar bobidagi xarajatlari miqdori oshmaydi.
* «Nyukasl» xo‘jayini Mayk Eshli ispaniyalik Rafael Benitesning ushbu ro‘yxatning kuchli uchligidan joy olishiga mutlaqo qarshi, albatta.
* Manuel Pellegrini va Unai Emeri misoli shuni ko‘rsatmoqdaki, «murabbiy sotib oldi» yoki «murabbiy sarfladi» tushunchasi aslida shartli ma’noga ega. Hattoki, Angliyada ham faqat bosh murabbiy talabi bilan futbolchi xarid qiladigan yoki sotadigan klub qolgani yo‘q.
* Germaniyalik Yurgen Klopp ushbu reytingning 13-qatorida, Luchano Spalletti 16-o‘rinda, Maurisio Pochettino esa 28-pog‘onada. Rossiyalik murabbiylar orasida xarajatga eng moyillari - Qurbon Berdiyev (79-o‘rin), Yuriy Syomin (98-o‘rin) va Leonid Sluskiy (114-o‘rin).
1. Jami xarajat
2. Jami xaridlar soni
3. Eng qimmatbaho xarid
Joze Mourinyo
1,52 mlrd. yevro
96 nafar futbolchi
Pol Pogba
«Yuventus» > «MYU» (2016 yil, 105 mln. yevro)
Karlo Anchelotti
1,20 mlrd. yevro
82 nafar futbolchi
Garet Beyl
«Tottenxem» > «Real» (2013 yil, 101 mln. yevro)
Xosep Gvardiola
1,15 mlrd. yevro
52 nafar futbolchi
Zlatan Ibragimovich
«Inter» > «Barselona» (2009 yil, 69,5 mln. yevro)
Manuel Pellegrini
1,04 mlrd. yevro
83 nafar futbolchi
Krishtianu Ronaldu
«MYU» > «Real» (2009 yil, 94 mln. yevro)
Massimiliano Allegri
1,01 mlrd. yevro
87 nafar futbolchi
Krishtianu Ronaldu
«Real» > «Yuventus» (2018 yil, 117 mln. yevro)
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
