PEPSI Superligasining 24-turi doirasida "Bunyodkor"ga qarshi o‘yindan oldin "Lokomotiv" yarim himoyachisi Sanjar Shoahmedov o‘z fikrlarini bildirib o‘tdi.

— Yaxshi, chiroyli o‘yin bo‘ladi. Bunga qadar milliy chempionatda ham, kubok o‘yinida ham ularga qarshi to‘qnashuvlar hujumkor tarzda o‘tgan. “Lokomotiv”ga ham, “Bunyodkor”ga ham 3 ochko kerakligi tufayli jamoalar ochiq o‘yin namoyish qiladi.

"Bunyodkor" juda kuchli va yaxshi jamoa. Tarkibning katta qismi anchagina yosh. Ular ham kuchli o‘yin ko‘rsatishadi. Bekorga tarkibning katta qismi turli yoshdagi termalarga jalb qilinmagan. Jamoadagi yosh va tajriba yaxshigina mujassamlashgan. "Bunyodkor"ning o‘yini kuchli ekanligini milliy chempionatda ko‘rmoqdamiz.

Ha, mavsumni yaxshi boshlay olmadik. Ammo, bu futbol. Eng kuchli jamoalar ham mag‘lub bo‘lishadi. Boshida yutqazdik, durang o‘ynadik. Ko‘plab ochkolar yo‘qotdik. Mana endi barcha yaxshi jismoniy holatga kirib oldi. Ayni damda turnir jadvalida birinchi o‘rindamiz. Ushbu pog‘onani saqlab qolishga harakat qilamiz.