PEPSI Суперлигасининг 24-тури доирасида "Бунёдкор"га қарши ўйиндан олдин "Локомотив" ярим ҳимоячиси Санжар Шоаҳмедов ўз фикрларини билдириб ўтди.

— Яхши, чиройли ўйин бўлади. Бунга қадар миллий чемпионатда ҳам, кубок ўйинида ҳам уларга қарши тўқнашувлар ҳужумкор тарзда ўтган. “Локомотив”га ҳам, “Бунёдкор”га ҳам 3 очко кераклиги туфайли жамоалар очиқ ўйин намойиш қилади.

"Бунёдкор" жуда кучли ва яхши жамоа. Таркибнинг катта қисми анчагина ёш. Улар ҳам кучли ўйин кўрсатишади. Бекорга таркибнинг катта қисми турли ёшдаги термаларга жалб қилинмаган. Жамоадаги ёш ва тажриба яхшигина мужассамлашган. "Бунёдкор"нинг ўйини кучли эканлигини миллий чемпионатда кўрмоқдамиз.

Ҳа, мавсумни яхши бошлай олмадик. Аммо, бу футбол. Энг кучли жамоалар ҳам мағлуб бўлишади. Бошида ютқаздик, дуранг ўйнадик. Кўплаб очколар йўқотдик. Мана энди барча яхши жисмоний ҳолатга кириб олди. Айни дамда турнир жадвалида биринчи ўриндамиз. Ушбу поғонани сақлаб қолишга ҳаракат қиламиз.