Avvalroq o‘zbekistonlik MMA jangchisi Otabek Aliyev Shaxrixon tumanida pichoqbozlik qurboniga aylangani haqida xabar bergan edik.
O‘zbekiston Respublikasi Ichki ishlar vazirligi rasmiy sayti ushbu voqea yuzasidan rasmiy ma’lumot berdi.
Unga ko‘ra, 18 sentyabr kuni Andijon viloyatining Shahrixon tumanida “Qorako‘rpa” MFYda yashovchi A.A. tanishi Otabek Aliyev boshqaruvidagi “Kobalt” avtomashinasida yo‘lovchi sifatida ketayotgan vaqtida “Vaxim” MFY hududiga yetib kelganda A.A. o‘rtalarida kelib chiqqan o‘zaro janjal sabab Otabek Aliyevga pichoq bilan jarohat yetkazgan.
Natijada O.A. shifoxonaga yotqizilib, A.A. qo‘lga olingan. Holat yuzasidan jinoyat ishi qo‘zg‘atilgan. Tergov harakatlari olib borilmoqda.
Shuni ham aytib o‘tish joizki, IIV Otabek Aliyevning so‘nggi holati haqida ochiq ma’lumot bermagan. Ammo ishonchli manbalarning Stadion.uz internet nashriga xabar berishicha, sportchi shifoxonada vafot etgan.
