O‘zbekiston Milliy olimpiya qo‘mitasi prezidenti Umid Ahmadjonov yaqinda O‘zbekiston axborot agentligi muxbiriga intervyu bergan edi.

Intervyuda Ahmadjonov O‘zbek sportchilarining muvaffaqiyat siri nimada ekanligiga oydinlik kiritgan bo‘lsa, suhbatning ushbu parchasida MOQ prezidenti Indoneziyada o‘tgan Osiyo o‘yinlarida qaysi sport turlarida erishgan yutuqlardan ko‘ngli to‘lgani va qaysi sport turlari uning hafsalasini pir qilgani haqida gapirdi.

— Osiyo o‘yinlari-2018da qaysi sport turlarida erishgan yutuqlarimizdan ko‘nglingiz to‘ldi va qaysi sport turlari hafsalangizni pir qildi?

— Bilasizmi, biz Osiyo o‘yinlarida bundan-da ko‘proq medallarga ega chiqish va natijalarni bir muncha yaxshilashni maqsad qilgan edik. To‘g‘ri, Indoneziyada Osiyo o‘yinlari tarixidagi eng yaxshi natijamizga erishdik, medallar sifati va soni bo‘yicha ham rekordlar yangilandi. Ammo shunga qaramay, ba’zi sport turlarida terma jamoamiz a’zolari kutilgan natijalarni ko‘rsata olmadilar. Jiu-jitsu, penchak silat, o‘q otish, suv sporti turlari, qilichbozlik, triatlon kabi sport turlaridan ham medallar kutgandik.

Lekin quvonarlisi, ushbu kemtik joylarni olimpiya sport turlarida vakillarimiz ko‘plab medallarga ega chiqib to‘ldirishdi. Boks, sport kurashlari, taekvondo WTF, baydarka va kanoeda eshkak eshish, og‘ir atletika, yengil atletika, akademik eshkak eshish, tennis, karate, dzyudo, badiiy va sport gimnastikasi kabi sport turlari ana shular jumlasidan.

Albatta, ular qatorida milliy sportimiz kurash alohida e’tirofga sazovor bo‘ldi. Polvonlarimiz Osiyo o‘yinlarida delegasiyamiz hisobiga 6 ta oltin, 2 ta kumush va 4 ta bronza, jami 12 ta medal qo‘shib qo‘yishdi va umumiy muvaffaqiyatimizga katta hissa qo‘shishdi. Shuningdek, musobaqada sambochilarimiz ham barchamizni xursand qilishdi.

Eslatib o‘tamiz, O‘zbekiston sport delegasiyasi Osiyo o‘yinlari musobaqasida umumjamoa hisobida 70 ta medal qo‘lga kiritib, 5-o‘rinni band etdi.