Ўзбекистон Миллий олимпия қўмитаси президенти Умид Аҳмаджонов яқинда Ўзбекистон ахборот агентлиги мухбирига интервью берган эди.

Интервьюда Аҳмаджонов Ўзбек спортчиларининг муваффақият сири нимада эканлигига ойдинлик киритган бўлса, суҳбатнинг ушбу парчасида МОҚ президенти Индонезияда ўтган Осиё ўйинларида қайси спорт турларида эришган ютуқлардан кўнгли тўлгани ва қайси спорт турлари унинг ҳафсаласини пир қилгани ҳақида гапирди.

— Осиё ўйинлари-2018да қайси спорт турларида эришган ютуқларимиздан кўнглингиз тўлди ва қайси спорт турлари ҳафсалангизни пир қилди?

— Биласизми, биз Осиё ўйинларида бундан-да кўпроқ медалларга эга чиқиш ва натижаларни бир мунча яхшилашни мақсад қилган эдик. Тўғри, Индонезияда Осиё ўйинлари тарихидаги энг яхши натижамизга эришдик, медаллар сифати ва сони бўйича ҳам рекордлар янгиланди. Аммо шунга қарамай, баъзи спорт турларида терма жамоамиз аъзолари кутилган натижаларни кўрсата олмадилар. Жиу-житсу, пенчак силат, ўқ отиш, сув спорти турлари, қиличбозлик, триатлон каби спорт турларидан ҳам медаллар кутгандик.

Лекин қувонарлиси, ушбу кемтик жойларни олимпия спорт турларида вакилларимиз кўплаб медалларга эга чиқиб тўлдиришди. Бокс, спорт курашлари, таэквондо WTF, байдарка ва каноэда эшкак эшиш, оғир атлетика, енгил атлетика, академик эшкак эшиш, теннис, каратэ, дзюдо, бадиий ва спорт гимнастикаси каби спорт турлари ана шулар жумласидан.

Албатта, улар қаторида миллий спортимиз кураш алоҳида эътирофга сазовор бўлди. Полвонларимиз Осиё ўйинларида делегациямиз ҳисобига 6 та олтин, 2 та кумуш ва 4 та бронза, жами 12 та медаль қўшиб қўйишди ва умумий муваффақиятимизга катта ҳисса қўшишди. Шунингдек, мусобақада самбочиларимиз ҳам барчамизни хурсанд қилишди.

Эслатиб ўтамиз, Ўзбекистон спорт делегацияси Осиё ўйинлари мусобақасида умумжамоа ҳисобида 70 та медаль қўлга киритиб, 5-ўринни банд этди.