Bugun Milliy olimpiya qo‘mitasi binosida o‘smirlar Olimpiya o‘yinlarida O‘zbekiston sharafini himoya qiladigan sportchilarimizni rasmiy kuzatish marosimi bo‘lib o‘tgani haqida xabar bergan edik.
Ushbu Tadbirda O‘zbekiston Respublikasi Bosh vazirining o‘rinbosari Aziz Abduhakimov, Milliy olimpiya qo‘mitasi prezidenti Umid Axmatdjanov hamda Jismoniy tarbiya va sport vaziri Dilmurod Nabiyevlar ishtirok etishdi.
Bosh vazir o‘rinbosari Aziz Abduhakimov tadbirda so‘zga chiqib, musobaqada O‘zbekiston sharafini himoya qiladigan sportchilarga omad tiladi.
“Yaqinda Jakartada bo‘lib o‘tgan Osiyo o‘yinlarida muvaffaqiyatli qatnashgan sportchilarimizni katta tantanalar bilan kutib olgandik. Endi esa navbat sizga keldi.
O‘smirlar Olimpiya o‘yinlari sportchi va murabbiylar uchun o‘z imkoniyatini namoyish etib, Tokio-2020 Olimpiya o‘yinlariga munosib tayyorgarlik ko‘rish uchun ajoyib imkoniyatdir.
Avvalgi Olimpiya o‘yinlarida o‘smirlarimiz 10 ta medal qo‘lga kiritgandi. Sizlar ushbu natijani yaxshilashning uddasidan chiqa olasizlar.
Yaqinlashib kelayotgan musobaqada sportchilarimizga muvaffaqiyatlar tilaymiz. Umid qilamizki, sizlarni medallar shodasi va yangi rekordlar bilan kutib olamiz”, – dedi Bosh vazir o‘rinbosari.
