"Real Madrid" klubi akademiyasi va O‘FA o‘rtasida tuzilgan kelishuvga asosan madridlik mutaxassislar tomonidan tanlab olingan 22 nafar bola Real Madrid Foundation Clinic dasturi bo‘yicha master klasslarda ishtirok etib, tajribalarini oshirish maqsadida Ispaniyaning Madrid shahriga jo‘nab ketgani haqida xabar bergan edik.   Ispaniyaga tashrifning to‘rtinchi kunida o‘zbekistonlik yosh futbolchilar “Real” klubi akademisining maydonida mashg‘ulotlarda ishtirok etdilar. Ertalabki mashg‘ulotlarda texnik-taktik sxemalarga e’tibor qaratildi. Himoyadan xujumga o‘tish uslublari hamda to‘p oldirilganda tezlik bilan himoyaga qaytish sxemalari ustida ish olib borildi.    Ertalabki mashg‘ulotlar nihoyasiga yetgach, bolalar tushlikka taklif qilindi. Tushlikdan so‘ng ularga ozgina dam berilib, kechki mashg‘ulotlar boshlandi. Mashg‘ulotlar nihoyasiga yetgach, o‘zbekistonlik bolalar hamda ularning murabbiylari o‘zlarini qiziqtirgan savollar bilan “Real” akademiyasi murabbiylariga murojaat qildilar. Ular futbol, mashg‘ulotlar hamda o‘qitish tizimlariga oid barcha savollarga batafsil javob berib o‘tdilar.