"Реал Мадрид" клуби академияси ва ЎФА ўртасида тузилган келишувга асосан мадридлик мутахассислар томонидан танлаб олинган 22 нафар бола Real Madrid Foundation Clinic дастури бўйича мастер классларда иштирок этиб, тажрибаларини ошириш мақсадида Испаниянинг Мадрид шаҳрига жўнаб кетгани ҳақида хабар берган эдик.   Испанияга ташрифнинг тўртинчи кунида ўзбекистонлик ёш футболчилар “Реал” клуби академисининг майдонида машғулотларда иштирок этдилар. Эрталабки машғулотларда техник-тактик схемаларга эътибор қаратилди. Ҳимоядан хужумга ўтиш услублари ҳамда тўп олдирилганда тезлик билан ҳимояга қайтиш схемалари устида иш олиб борилди.    Эрталабки машғулотлар ниҳоясига етгач, болалар тушликка таклиф қилинди. Тушликдан сўнг уларга озгина дам берилиб, кечки машғулотлар бошланди. Машғулотлар ниҳоясига етгач, ўзбекистонлик болалар ҳамда уларнинг мураббийлари ўзларини қизиқтирган саволлар билан “Реал” академияси мураббийларига мурожаат қилдилар. Улар футбол, машғулотлар ҳамда ўқитиш тизимларига оид барча саволларга батафсил жавоб бериб ўтдилар.