20-25 oktyabr kunlari Samarqandda baydarka va kanoeda eshkak eshish bo‘yicha kattalar o‘rtasida Osiyo kubogi, 23 yoshgacha bo‘lgan yoshlar o‘rtasida Osiyo chempionati, shuningdek, parakanoe bo‘yicha kit’a chempionati bo‘lib o‘tadi.

Ayni paytda Samarqanddagi maxsus eshkak eshish majmuasida ushbu musobaqalarni tashkil etish uchun qizg‘in tayyorgarlik ishlari ko‘rilmoqda. Mazkur sport kompleksi eshkak eshish bo‘yicha xalqaro musobaqalar o‘tkazish bo‘yicha talab va me’yorlarga to‘liq javob beradi.

Shunga qaramay, Osiyoning 15 mamlakatidan tashrif buyuradigan terma jamoa vakillarini munosib kutib olish, musobaqalar vaqtida ularga barcha qulayliklarni yaratish bo‘yicha keng ko‘lamdagi ishlar amalga oshirilmoqda.

Ushbu musobaqalarda 127 nafar o‘zbekistonlik sportchi ishtirok etadi. Jumladan, milliy terma jamoadan 50 nafar, yoshlar terma jamoasidan 65 nafar va parakanoe jamoasidan 12 nafar sportchi bellashuvlarda qatnashadi.

Xalqaro sport musobaqalarini dastlab parakanoechilar boshlab beradilar. Ular chempionat doirasida 200 metr masofaga kuch sinashadilar. Kattalar o‘rtasidagi bahslarda esa sportchilar 200-500-1000 metr masofalarga bellashadilar. Unda erkak sportchilar K-1, K-2, K-4, S-1, S-2, S-4 qayiqlarida kuch sinashadilar.

Ayollar o‘rtasida esa 200 va 500 metr masofalarga yuqorida sanab o‘tilgan qayiqlarda bahslar tashkil qilinadi. 23 yoshgacha bo‘lgan sportchilar o‘rtasidagi bellashuvlarda 200-500-1000 metr masofalarga K-1, K-2, K-4, S-1, S-2, S-4 qayiqlarida murosasiz kurashlar bo‘lib o‘tadi.