O‘zbekiston yoshlar terma jamoasi Ispaniyadagi dastlabki mashg‘ulotini o‘tkazdi. Toshkentdan Esteponaga 14 soatda yetib kelgan futbolchilar uchun mashg‘ulotning ilk kunida kuchli zo‘riqish berilmadi. Ular asosan tiklanish mashg‘ulotlarida ishtirok etdi.    Shu kuni jamoa murabbiyi Sarvar Haydarovning tavallud topgan kuni bo‘lib, futbolchilar kechki ovqat vaqtida murabbiyni tabriklashdi. Unga esdalik uchun yosh futbolchilar imzosi tushirilgan to‘p sovg‘a qilindi. Tashkilotchilar esa delegasiyani shirinlik bilan siyladi.    “Kutilmagan va yoqimli sovg‘a bo‘ldi. Hammasidan ham xursand bo‘lganim yigitlarimizda jipslashish boshlanganidir. Ular kun davomida menga bilintirmay shunday birlasha olgan bo‘lishsa, demak, ahillik borasidagi savolga hozircha ehtiyoj yo‘q va biz bundan juda xursandmiz”, — deydi Sarvar Haydarov.    Marbellada O‘zbekiston termasi uchun ikkita maydon ajratib qo‘yilgan. Yig‘in yakuniga qadar mazkur maydonlar faqatgina bizga tegishli bo‘ladi. Ular shunchaki ideal holatda. Bunday maydonlarda o‘ynash har qanday futbolchiga nafaqat katta foyda, balki zavq ham beradi.    “Oldin ham xorij yig‘inlarida bo‘lganman. Biroq bunisi boshqacha bo‘lyapti. Bizga bo‘lgan e’tibor, biz uchun berilgan maydonlar, otellar — hammasi a’lo darajada. Futbolchilarimiz ham o‘zlarini fantastik muhitda his qilishyapti. Buning uchun O‘FA rahbariyatiga o‘z minnatdorchiligimni izhor qilaman”, — deb aytib o‘tdi terma bosh murabbiyi Otabek G‘ulomxo‘jayev.    Ma’lumot uchun, Marbellada, shuningdek, Daniya, Shvesiya hamda Rossiyaning U20 terma jamoalari ham mashg‘ulot olib borishmoqda. Mazkur termalar yondosh maydonlarda mashg‘ulot olib bormoqda.