Argentinada III yozgi o‘smirlar Olimpiya o‘yinlari nihoyasiga yetib bormoqda. O‘zbekistonlik muxlislar uchun albatta boks bo‘yicha bahslar katta qiziqishga sabab bo‘lmoqda. Bugun uch nafar bokschimiz yarim finalda o‘z janglarini o‘tkazishdi.
-69 kg vazn toifasida musobaqada ishtirok etgan Jahongir Rahmonov argentinalik Agustin Arregiga qarshi jang qildi va imkoniyatni boy berib qo‘ydi — 2:3 (29-28, 29-28, 28-29, 28-29, 27-30). Hamyurtimiz dastlabki saralash bahsida ham ushbu mezbon bokschi shunday hisobda imkoniyatni boy bergandi.
-81 kg vaznli Timur Merjanov rossiyalik Ruslan Kolesnikovga mag‘lub bo‘ldi — 0:5 (28-29, 28-29, 28-29, 27-30, 28-29).
-56 kg vazn toifasida yurtimiz sharafini himoya qilgan Abdumalik Xalakovning argentinalik bokschi Mirko Kuelyoga qarshi jangi esa kechaning eng shiddatli to‘qnashuvlaridan biri bo‘ldi. Arenaga yig‘ilganlarning asosiy qismi albatta bu jangda mezbon bokschiga muxlislik qilishdi, jang davomida qo‘llab-quvvatlashdi. Shunga yarasha Kuelyo ham jangni ajoyib o‘tkazdi. Ammo, bahs davomida ko‘proq ustunlikka erishgan Abdumalik yakunda g‘alaba qozondi va final yo‘llanmasiga ega bo‘ldi. 5:0 (30-27, 30-27, 30-27, 30-27, 30-27).
Endi ikki nafar bokschimiz bronza medali uchun jang qilsa, biri oltin medal uchun ringga ko‘tariladi.
Boks
17 oktyabr:
Bronza medali uchun:
-69 kg: Jahongir Rahmonov – Nijat Hasanov (Ozarbayjon) (22:00).
18 oktyabr:
Oltin medal uchun:
-56 kg: Abdumalik Xalakov – Maksim Kalinichev (Ukraina) (21:30).
Bronza medali uchun:
-81 kg: Timur Merjanov – Yusuf Ali Karar (Misr) (22:45).
Izoh: Soatlar Toshkent vaqti bilan ko‘rsatilgan.
