Joriy yilning 12 oktyabr kuni jinoyat ishlari bo‘yicha Yakkasaroy tuman sudi o‘zbekistonlik mashhur aralash qoidalar jangchisi Murod Xonto‘rayevga nisbatan jazo tayinladi. Bu haqda O‘zbekiston Respublikasi Oliy sudi rasmiy vakili “Qalampir.uz”ga ma’lum qildi.
Xabaringiz bor, Murod Xonto‘rayev va bir qator shaxslar joriy yilning 20 iyun kunidan 21 iyun kuniga o‘tar kechasi Yunusobod tumanida joylashgan tungi klublardan birida jamoat joyida yurish-turish qoidalarini buzganlik va tartibsizlik keltirib chiqargani uchun qo‘lga olingangandi.
Ularga nisbatan O‘zbekiston Respublikasi Jinoyat kodeksining 277-moddasi (bezorilik) tartibida jinoyat ishi qo‘zg‘atilgan edi.
Temur Qosimov raisligidagi sud Murod Xonto‘rayev (1987 y. Toshkent shahrida tug‘ilgan), Doniyor Vahobov (1994 y. Toshkent shahrida tug‘ilgan) va Ilhomjon Parpiyev (1993 y. Toshkent viloyatida tug‘ilgan)ga nisbatan jinoyat ishini ko‘rib chiqdi va hukmni e’lon qildi.
Sud jinoyat ishi materiallarini har tomonlama va to‘liq o‘rganib, M. Xonto‘rayev va D. Vahobovni O‘zbekiston Respublikasi Jinoyat kodeksining 277-moddasi (“Bezorilik”) 3-qismi “a” bandi, I. Parpiyevni O‘zbekiston Respublikasi Jinoyat kodeksining 168-moddasi (“Firibgarlik”) 1-qismi va 277-moddasi (“Bezorilik”) 2-qismi “a”, “b”, “v” bandlarida ko‘zda tutilgan jinoyatlarni sodir etishda aybdor deb topdi.
Jinoyat ishlari bo‘yicha Yakkasaroy tuman sudi Murod Xonto‘rayevga eng kam oylik ish haqining 94 barobari miqdorida 16 190 560 so‘m (172 240 so‘m hisobida) jarima jazosi, D. Vahobovga 3 yil 8 kun muddatga ozodlikni cheklash jazosi, I. Parpiyevga oylik ish haqidan 20 foiz davlat foydasiga ushlab qolgan xolda 2 yil 1 oy 24 kun muddatga ahloq tuzatish ishlari jazosi tayinladi.
Ta’kidlash joizki, sudlanuvchilarga jazo tayinlashda ular istiqomat qiluvchi mahalla fuqarolar yig‘inlari tomonidan taqdim etilgan o‘z kafilligiga olish haqidagi xatlari inobatga olindi.
