Superligada kim o‘ynaydi, nechta klub o‘ynaydi, Pro-Liga nima bo‘ladi? Bu borada har birimizning o‘z fikrimiz, o‘z haqiqatimiz bor. Va ular albatta bir-biridan farq qiladi.
Superligada jamoalar sonining 12 tagacha qisqartirilganiga sabab faqatgina Superligani odambashara qilish emas, balki Pro-Ligani ham kuchaytirish bo‘lgan. Bitta haqiqat bor, agar Pro-Ligada sog‘lom raqobat bo‘lmas ekan, Superliga oldinga qadam tashlamaydi, deya yozadi O‘zPFL direktori maslahatchisi Diyor Imomxo‘jayev.
Tez kunlarda klublar uchun professionallik maqomini beruvchi yo‘riqnoma ishlab chiqiladi. Bu futbol jamoalari uchun oyna vazifasini bajarib berishi kerak. Ya’ni, har qanday klub unga qarash orqali o‘zining qanday ekanini ko‘rib olsin va tushunsinki, u qaysi liganing jamoasi. Kimda kamchilik bo‘lsa, shu yo‘riqnoma asosida ishlasin va o‘z orzusi uchun kurashsin.
PFL yo‘riqnomani o‘z qarichlari bilan o‘lchamaydi, albatta. Bunda OFK talablari o‘z ifodasini topadi, shartnomalar masalasi FIFA talablari asosida bo‘ladi. Professional klub maqomini olgan klublar soliqlar masalasida imtiyozlarni qo‘lga kiritadi. Bunda Superliga uchun, Pro-Liga uchun, 2-liga uchun alohida me’yorlar bo‘ladi.
Shuningdek, professional futzal klub, professional ayollar klubi, professional bolalar klubi degan tushunchalar bo‘ladi. Aytaylik, “Ardus” degan jamoa faqat futzalga ixtisoslashgan, u PFL talablari bo‘yicha faoliyat olib boradi va uning musobaqalarida bemalol qatnashadi.
Kimgadir kattalar futboli umuman qiziq emas, futbol maktabi bo‘lishini istaydi. Marhamat!
Hozircha ayrim klublarning oynaga qarashini quyidagi rasm to‘la ifodalab bersa kerak. Shunchaki o‘zimizni aldamasligimiz kerak.
