Ektor Kuper O‘zbekiston milliy jamoasi boshqaruvida dastlabki ikki o‘yinda g‘alaba qozona olmagan birinchi murabbiy emas.

Mamlakatimiz futboli tarixida shunday natija qayd etgan dastlabki mutaxassis Vladimir Salkovdir. Agar termani faqatgina ikkita o‘yinda boshqargan Aleksandr Ivankovni hisobga olmasak. Salkov ham Kuper singari milliy jamoamiz rulida uchinchi o‘yinida g‘alaba qozongan.

Isroil va Armanistonga imkoniyatni boy bergan Salkov shogirdlari Ozarbayjonni mag‘lub etishgandi. Raqamlar va faktlar O‘zbekiston terma jamoasining FIFA saytidagi o‘yinlar ro‘yxatidan olingan.

Rauf Inileev va Mirjalol Qosimov ham uchinchi o‘yinida ilk g‘alabasini nishonlagan. Qosimov (54) va Inileev (29) O‘zbekiston termasida eng ko‘p o‘yin o‘tkazgan murabbiylar hisoblanishadi. Bu borada uchinchi o‘rinda borayotgan Vadim Abramov (28 o‘yin) esa o‘zining beshinchi o‘yinida ilk g‘alabasini nishonlagan.

Shuningdek, Ravshan Haydarov ham birinchi g‘alabasiga beshinchi uchrashuvda erishgan. Umuman olganda, Haydarov dastlabki g‘alabasini nishonlash uchun 1 yil, 3 oy, 6 kun kutishiga to‘g‘ri kelgan.

Xullas, termamizni eng ko‘p boshqargan murabbiylar ro‘yxatida dastlabki to‘rtta o‘rinni egallab turgan mutaxassislarning hech biri dastlabki g‘alabasini bir yoki ikkinchi o‘yinida nishonlamagan.

Yana bir detalga e’tibor qaratamiz. Ularning barchalari termaga Osiyo kubogida ustozlik qilishgan, hammalari kamida chorak finalga chiqishgan.

Birinchi bo‘lib 2004 yili Haydarov shunday natija qayd etgan, deb yozmoqda hamkasbimiz Alisher Nikimbayev o‘zining telegramm kanalida... 2007 yili Inileev uning ko‘rsatkichini takrorlagan. 2011 yili Abramov 4-o‘rinni egallagan bo‘lsa, 2015 yili Qosimov chorak finalgacha yetib borgan.