Bugun U-14 va U-16 yosh toifasidagi jamoalarimiz mamlakat birinchiligining dastlabki bosqichi so‘nggi tur uchrashuvlarini o‘tkazishdi.
O‘zingizga ma’lum, U-16 jamoamizga Eldor Moyliyev va Ilyos Pardayevlar murabbiylik qilishsa, U-14 jamoamizga Eldor Moyliyev va Nurali Qo‘ng‘irovlar ustozlik qilishmoqda.
Ushbu yosh toifasidagi jamoalarimiz bugun Qarshida navbatdagi tur uchrashuvlarini o‘tkazishdi. Jamoalarimiz “Sho‘rtan” klubi tarbiyalanuvchilariga qarshi maydonga tushishdi. Uchrashuv futbol maktabimiz maydonida bo‘lib o‘tdi.
U-16 jamomiz raqibini 5:1 hisobida dog‘da qoldirdi. Uchrashuvdagi gollarimizni Shaxzod Xushvaqtov (3ta), Dilshod Berdiyev va Bekjon Rahmatovlar kiritishdi. Ushbu jamoamiz bugun deyarli ikkinchi tarkib bilan maydonda harakat qildi.
U-14 jamoamiz esa g‘uzorlik tenqurlari ustidan 6:1 hisobida g‘alaba qozonishdi. Bu uchrashuvdagi gollarni Maxmud Jo‘raboyev, Javohir Otamurodov (2ta), Islom Kenjaboyev, Muhammad Mavlonov hamda Elyor Yulbarsovlar kiritishdi. Bu jamoamiz tarkibida ham maydonga ko‘p tushmagan yosh futbolchilarimiz harakat qilishdi.
Shunday qilib, o‘smirlarimiz birinchilikning dastlabki bosqich uchrashuvlarini nihoyasiga yetkazishdi. Shuni alohida ta’kidlash joizki, jamoalarimiz birinchi bosqichni mag‘lubiyatsiz yakunlashdi. Endi jamoalarimiz, g‘olib sifatida keyingi bosqich – birinchilikning final bosqichida ishtirok etishadi.
Navbatdagi bosqich uchrashuvlari noyabr oyida bo‘lib o‘tadi. Jamoamiz raqiblari qur’a orqali aniqlanadi.
