Superliganing 27-turida muxlislar "Bunyodkor" va "Paxtakor" o‘rtasidagi Toshkent derbisiga guvoh bo‘lishadi.
Toshkentning ikki eng sovrindor jamoasi o‘zaro chempionatlar doirasida 24 bor to‘qnash kelgan. "Sherlar" 7 bellashuvda zafar quchishgan, 8 o‘yinda "Bunyodkor" g‘olib chiqqan. 9 uchrashuvda jamoalar durang o‘ynashgan. Safarda 2 g‘alaba, 3 durang va 7 mag‘lubiyat kuzatilgan.
Ayni paytda jamoalar turnir jadvalida sovrinli o‘rinlar uchun kurashni davom ettirishmoqda. Bu esa bellashuv ahamiyatini ikki baravar oshiradi desak mubolag‘a bo‘lmaydi.
Raqibga qarshi bellashuvlarda "Paxtakor" to‘purari Igor Sergeev sanaladi. U "qaldirg‘ochlar" darvozasiga 5 gol urishga erishgan. Igor ulardan uchtasini uyda, ikkitasini safarda kiritgan.
Uchrashuvni sariq kartochkalar bilan bog‘liq diskvalifikasiya sababli jamoamizdan Dilshod Rahmatullayev, raqibdan Javlon Ibrohimov va Xurshid G‘iyosov o‘tkazib yuboradi.
"Bunyodkor" va "Paxtakor" o‘rtasidagi o‘yin 24 oktyabr, chorshanba kuni 18:00da "Milliy" stadionda boshlanadi.
