28 oktyabr butun jahon bo‘ylab dzyudo kuni nishonlanadi. Shu munosabat bilan O‘zbekiston dzyudo federasiyasida ham ushbu bayram keng nishonlandi.

500 nafardan ortiq sportchini qamrab olgan tadbirda terma jamoa murabbiyi Farhod To‘rayev, o‘zbek dzyudosi yulduzlari Diyorbek O‘rozboyev, G‘iyos Boboyev, Gulnoza Matniyozova, terma jamoamizning boshqa a’zolari, yosh dzyudochilar, ishtirok etishdi. Tajribali sportchilarimiz bo‘lajak polvonlarga mahorat saboqlarini o‘tkazishdi, ular bilan suhbatlashishdi. Chempionlarimiz bolajonlarga muvaffaqiyatga erishish sirlari haqida gapirib berdilar.

Albatta, sportning ommalashishida bunday tadbirlarning o‘rni katta. Aslida dzyudo kunini o‘tkazishdan maqsad – sportning ushbu turini targ‘ib qilish, ommalashtirish, aholini dzyudoga qiziqtirishdan iboratdir. Tashkilotchilar ushbu tadbir orqali o‘z maqsadlariga erishdilar deb bemalol aytishimiz mumkin.