Xabaringiz bor, kecha Farg‘onadagi “Istiqlol” arenasida futbol bo‘yicha mamlakat kubogi final uchrashuvi bo‘lib o‘tdi. Anchagina qiziqarli va keskin kurashlarga boy tarzda o‘tgan o‘yindan so‘ng AGMK jamoasi o‘z tarixida ilk marta mamlakat kubogi g‘olibiga aylandi.
Olmaliq shahri jamoasining yetakchilaridan biri Zohir Pirimov final taassurotlari bilan o‘rtoqlashdi.
- Ancha vaqtdan buyon AGMK jamoasi safida o‘ynab kelaman. Mana birinchi bora ushbu jamoa tarkibida O‘zbekiston kubogi finalida ishtirok etdim. To‘g‘risi, ushbu o‘yin mening faoliyatimda hozirgacha bo‘lgan uchrashuvlar ichida eng muhimi edi. Shu sababdan ham butun jamoamiz maydonda bor kuchini 100 foizga emas, balkim 200 foizga ishga solishga urindi. Yakunda omad bizga kulib boqdi. Bunda murabbiylarimiz tanlagan taktika juda muhim o‘rin egallaganini ayta olaman. Sababi e’tibor bergan bo‘lsangiz, asosan murabbiylarimiz uqtirganidek tartibli o‘yin namoyish etishga urindik.
Umuman olganda, final juda ajoyib tarzda o‘tdi. Undan olam-olam taassurotlar qoldi. Tashkilotchilik masalasida ham, stadiondagi atmosfera ham qoyilmaqom bo‘ldi. Muxlislar havo harorati ancha past va o‘yin bo‘yi shamol esgan bo‘lsa-da qizg‘in qo‘llab-quvvatlab turishdi. Buning uchun ulardan minnatdormiz.
Endi kubok egasi sifatida Osiyo Chempionlar ligasida ishtirok etish imkoniga ega bo‘lamiz. Ayni paytda AGMKda yaxshi jamoa shakllanib boryapti. Agar shu ruhda davom etsak, nasib etsa, xalqaro maydonda ham ishqibozlarimiz ishonchini oqlashga harakat qilamiz, - dedi mahoratli futbolchi.
Ta’kidlash joiz, Zohir Pirimov final o‘yinida jamoasining uchinchi goliga mualliflik qildi.