Хабарингиз бор, кеча Фарғонадаги “Истиқлол” аренасида футбол бўйича мамлакат кубоги финал учрашуви бўлиб ўтди. Анчагина қизиқарли ва кескин курашларга бой тарзда ўтган ўйиндан сўнг АГМК жамоаси ўз тарихида илк марта мамлакат кубоги ғолибига айланди.

Олмалиқ шаҳри жамоасининг етакчиларидан бири Зоҳир Пиримов финал таассуротлари билан ўртоқлашди.

- Анча вақтдан буён АГМК жамоаси сафида ўйнаб келаман. Мана биринчи бора ушбу жамоа таркибида Ўзбекистон кубоги финалида иштирок этдим. Тўғриси, ушбу ўйин менинг фаолиятимда ҳозиргача бўлган учрашувлар ичида энг муҳими эди. Шу сабабдан ҳам бутун жамоамиз майдонда бор кучини 100 фоизга эмас, балким 200 фоизга ишга солишга уринди. Якунда омад бизга кулиб боқди. Бунда мураббийларимиз танлаган тактика жуда муҳим ўрин эгаллаганини айта оламан. Сабаби эътибор берган бўлсангиз, асосан мураббийларимиз уқтирганидек тартибли ўйин намойиш этишга уриндик.

Умуман олганда, финал жуда ажойиб тарзда ўтди. Ундан олам-олам таассуротлар қолди. Ташкилотчилик масаласида ҳам, стадиондаги атмосфера ҳам қойилмақом бўлди. Мухлислар ҳаво ҳарорати анча паст ва ўйин бўйи шамол эсган бўлса-да қизғин қўллаб-қувватлаб туришди. Бунинг учун улардан миннатдормиз.

Энди кубок эгаси сифатида Осиё Чемпионлар лигасида иштирок этиш имконига эга бўламиз. Айни пайтда АГМКда яхши жамоа шаклланиб боряпти. Агар шу руҳда давом этсак, насиб этса, халқаро майдонда ҳам ишқибозларимиз ишончини оқлашга ҳаракат қиламиз, - деди маҳоратли футболчи.  

Таъкидлаш жоиз, Зоҳир Пиримов финал ўйинида жамоасининг учинчи голига муаллифлик қилди.