Belgiya – 2016 yilning mart oyida Belgiya poytaxti Bryusseldagi aeroportda sodir bo‘lgan portlash oqibatida Sebastyan Bellen chap oyog‘ining bir qismidan ayrildi va shu oyog‘idagi sezgi butunlay yo‘qoldi. Ikki yarim yil oldin u yugurish tugul, hatto yura olishiga ham ishonmasdi. Endi esa sobiq basketbolchi shahar marafonida ishtirok etish arafasida.

“Men reabilitasiya markazida ikki yarim yil kutgan muhim payt keldi, – deydi u "Euronews"ga bergan intervyusida. – Bu mening eng katta maqsadlarimdan biri. Endi faqat bir narsadan xavotirdaman: bu yuklamani ko‘tara olrmikanman” Sebastyan start oldidan so‘nggi mashqlarni bajarmoqda. Bir necha daqiqalardan so‘ng u minglab sportchilar orasiga singib ketdi. Biroz vaqtdan so‘ng shahar markazi orqali o‘tkaziladigan yugurish bahslariga start berildi.

– Sebastyan masofaning bir qismini bosib o‘tdi, – deya sharhlaydi Euronews jurnalisti Deymon Embling. – Ammo 42 kilometrlik marafon uning uchun ham jismoniy, ham ruhiy tomondan ulkan sinov. Yugurish yo‘nalishi ham oson emas, unda bir necha qiyaliklar mavjud. Taxminan besh yarim soatlardan so‘ng Sebastyan finish chizig‘ini yuragi to‘lib, o‘z hayratini yashirolmay kesib o‘tdi.

– Ajoyib, endi ushbu punktda mening nomim ostiga ham belgi qo‘yiladi. Bilasizmi, shifoxona krovatida o‘tgan ikki yarim yil davomida men mana shunday ishni uddalay olishim haqida o‘ylamagan ham edim.

– Bosib o‘tilgan masofa uzoq tuyuldimi?

– Ha, bu haqiqiy sarguzasht bo‘ldi.