Бельгия – 2016 йилнинг март ойида Бельгия пойтахти Брюсселдаги аэропортда содир бўлган портлаш оқибатида Себастянь Беллен чап оёғининг бир қисмидан айрилди ва шу оёғидаги сезги бутунлай йўқолди. Икки ярим йил олдин у югуриш тугул, ҳатто юра олишига ҳам ишонмасди. Энди эса собиқ баскетболчи шаҳар марафонида иштирок этиш арафасида.

“Мен реабилитация марказида икки ярим йил кутган муҳим пайт келди, – дейди у "Euronews"га берган интервьюсида. – Бу менинг энг катта мақсадларимдан бири. Энди фақат бир нарсадан хавотирдаман: бу юкламани кўтара олрмиканман” Себастянь старт олдидан сўнгги машқларни бажармоқда. Бир неча дақиқалардан сўнг у минглаб спортчилар орасига сингиб кетди. Бироз вақтдан сўнг шаҳар маркази орқали ўтказиладиган югуриш баҳсларига старт берилди.

– Себастянь масофанинг бир қисмини босиб ўтди, – дея шарҳлайди Euronews журналисти Дэймон Эмблинг. – Аммо 42 километрлик марафон унинг учун ҳам жисмоний, ҳам руҳий томондан улкан синов. Югуриш йўналиши ҳам осон эмас, унда бир неча қияликлар мавжуд. Тахминан беш ярим соатлардан сўнг Себастянь финиш чизиғини юраги тўлиб, ўз ҳайратини яширолмай кесиб ўтди.

– Ажойиб, энди ушбу пунктда менинг номим остига ҳам белги қўйилади. Биласизми, шифохона кроватида ўтган икки ярим йил давомида мен мана шундай ишни уддалай олишим ҳақида ўйламаган ҳам эдим.

– Босиб ўтилган масофа узоқ туюлдими?

– Ҳа, бу ҳақиқий саргузашт бўлди.