AGMK jamoasi 28 oktyabr kuni Farg‘onadagi “Istiqlol” stadionida o‘tkazilgan O‘zbekiston kubogi-2018 final bahsida “Paxtakor”ni mag‘lub etib, o‘z tarixida ilk marta mamlakat kubogini boshi uzra ko‘tardi.

AGMK jamoasi yetakchilaridan biri Kamoliddin Murzoyev final o‘yindan taassurotlari bilan o‘rtoqlashdi:

- AGMKning final bahsida g‘alaba qozongani – klub uchun tarixiy voqea bo‘ldi. Ushbu yutuq bilan barcha olmaliqlik futbol ishqibozlarini tabriklayman. Final o‘yini ko‘pchiligimiz uchun faoliyatimizdagi eng muhim bellashuvlardan biri bo‘ldi. O‘yin Farg‘onada – neytral maydonda juda yaxshi saviyada tashkillashtirildi. O‘yindan bir kun avval Farg‘onaga yetib borgan paytimizdagi kutib olish marosimidanoq final shukuhi sezildi. O‘yin kuni ham barchasi ajoyib tarzda tashkillashtirildi.

Balkim ko‘pchilik quyi o‘rinlarda borayotganimiz sabab bizning g‘alaba qozonishimizni kutmagandir. Lekin biz yakdil jamoa sifatida o‘z o‘yinimizni ko‘rsata oldik va tarixiy g‘alabani qo‘lga kiritdik. Final kuni bizni qo‘llab-quvvatlab turgan barcha ishqibozlardan ham minnatdormiz. 

Bir narsani ta’kidlashim joizki, ushbu muvaffaqiyat sekin-asta AGMKda yaxshi jamoa shakllantirilayotganidan dalolat beradi. So‘nggi 2 yilda shu maqsadda ancha mehnat qilindi. Endi Osiyo Chempionlar ligasida ham agar finaldagi kabi shijoat ko‘rsata olsak, muxlislarimizni g‘alabalar bilan yana xursand etishimizga ishonaman, - dedi futbolchi.