"Nasaf" futbol maktabidan yetishib chiqib, hozirgi paytda “ajdarlar” sharafini munosib himoya qilib kelayotgan o‘yinchilar talaygina. Shular qatorida yarim himoyachimiz Sharof Muhitdinov ham bor. Borgan sari uning o‘yinlari chiroyli va mazmunli bo‘layotganini, futbol ishqibozlari ham e’tirof etishmoqda. "Nasaf" klubi matbuot xizmati futbolchidan ertaga, “Qo‘qon-1912” jamoasi bilan bo‘ladigan o‘yin haqidagi fikrlari bilan o‘rtoqlashishni so‘radi.

"Ertaga bizni qiziqarli o‘yin kutib turibdi, har doimgidek ushbu o‘yinga ham puxta tayyorgarlik ko‘rdik. Jamoadoshlarimni kayfiyati juda zo‘r. Keyingi uchrashuvlarda g‘alabalarimiz bilan muxlislarimizni xursand qilayotganimizdan mamnunmiz. “Qo‘qon-1912” jamoasi keyingi uchrashuvlarda muvaffaqiyat qozona olmayotgan bo‘lsada, bu jamoa o‘z o‘yini bilan har qanday jamoaga qarshi kuchli o‘yin ko‘rsata oladigan kuchga ega. Jamoa tarkibida yetarli tajribaga ega futbolchilar jamlangan. Jamodoshlariga nisbatan yoshroq bo‘lsada, Javohir Siddiqovning ko‘rsatayotgan o‘yinlarini alohida ta’kidlagan bo‘lar edim.

Biz uchun esa endi orqaga yo‘l yo‘q. Qolgan uchrashuvlarni ko‘tarinki ruhda o‘tkazib, g‘alabalarimizni aziz muxlislarimizga tuhfa etish niyatidamiz. Jamoadoshlarimning barchasi ana shu kayfiyatda.

O‘tgan turdagi golim haqida? Albatta, o‘z goling bilan jamoang yutug‘iga hissa qo‘shish juda yoqimli. Ammo men uchun qanday holatda gol urishni farqi yo‘q. Muhimi to‘g‘ri kelib qolsa,  gol bo‘lsa bo‘ldi. Ba’zan o‘yinda hujumlarimiz golga aylanmay qoladi. Shuni hisobga olib, murabbiyimiz raqib darvozasiga uzoqdan zarba yo‘llab turishim haqida, o‘yindan oldin ko‘rsatma beradi. Buni uddalasam o‘zim ham xursand bo‘laman. Bizda asosan jamoaviy o‘yinga katta e’tibor beriladi. Maydonda hamma birdek harakat qilishi talab etiladi. Shundan kelib chiqib, o‘yindagi urilgan gol hammamizniki deb, hisoblayman.

Ertaga ob-havo yaxshi bo‘lib, muxlislarimiz stadionga ko‘proq kelishsa deyman, muxlislarimiz qancha ko‘p bo‘lishsa bu – bizga shuncha zavq beradi", - deydi Sharof Muhitdinov.