Turkiyada futbol infratuzilmalari bo‘yicha FIFA seminari bo‘lib o‘tdi. Seminarda 15ta mamlakat futbol assosiasiyalari, shu jumladan, O‘zbekiston futbol assosiasiyasi vakillari ham ishtirok etishdi.

Seminardan ko‘zlangan asosiy maqsad futbol infratuzilmalarini yaxshilash, yangi zamonaviy texnologiyalar yordamida futbol maydonlari chimlarini parvarish qilish, tabiiy va sun’iy qoplamali maydonlarni talab darajasida saqlash uchun amalga oshirish kerak bo‘lgan chora-tadbirlar haqida ishtirokchilarga ma’lumot berishdan iborat bo‘ldi. Shuningdek, stadionlar, texnik markazlar va federasiya (assosiasiya) binolarini rekonstruksiya qilishda, ularning holatini yaxshilashda "FIFA Forvard" dasturidan qanday moliyaviy ko‘mak olish bo‘yicha amaliy maslahatlar berib o‘tildi.

Ishtirokchilarga berilgan ma’lumot va maslahatlar futbol infratuzilmasi rivojlangan mamlakatlar misolida o‘rganildi.

Seminarda ishtirok etgan FIFA vakili Byorn Vassalo va UYEFA vakili Tyerri Favr bu kabi seminarlar ishtirokchilar o‘rtasida tajriba almashish va yangi g‘oyalarni qo‘lga kiritish nuqtai nazaridan nihoyatda muhim ekanini ta’kidlab o‘tishdi.

Shuningdek, seminar ishtirokchilari Turkiya futbol federasiyasi bilan ham yaqindan tanishish imkoniyatiga ega bo‘lishdi.