«Borussiya» Bundesligada mag‘lubiyatga uchramagan holda peshqadamlik qilmoqda. Chempionlar Ligasida esa barcha uchta o‘yinda ham zafar quchdi. «Bryugge»ni 1:0 hisobida mag‘lub etgan dortmundliklar «Monako»ni 3:0, «Atletiko»ni esa 4:0 hisobida dog‘da qoldirishdi. Lyusyen Favr jamoasida 20 yosh artofidagi 5 nafar futbolchi o‘ynamoqda. Quyida ana shu iqtidorlar haqida so‘z yuritamiz.
Kristian Pulishich (AQSH) - 20 yosh
Amerikalik futbolchi «Borussiya»da to‘liq mavsumni o‘tkazgan. 2017|2018 yillar mavsumida 43ta o‘yinda maydonga tushib, 5ta gol urishga ham erishgan. Umuman olganda, o‘tgan oyda 20 yoshini nishonlagan Kristian professional futbolda yuzdan oshiq o‘yin o‘tkazishga ulgurdi. 15ta gol urgan futbolchi 20 marta assistentlik ham qildi. U Bundesligada to‘p kiritgan eng yosh xorijlik futbolchi hisoblanadi. E’tiborli tomoni, bu ishni balog‘at yoshiga yetmasdanoq uddalagan. Joriy mavsumda Pulishichga jarohatlar biroz pand bermoqda. Agar sog‘ bo‘lsa, muntazam asosiy tarkibda maydonga tushadi. «Atletiko»ga qarshi uchrashuvda Kristian 79 daqiqa o‘ynadi. Garchi gol urmagan bo‘lsada, o‘zini ko‘rsata oldi. Amerikalik vingerni «Borussiya» o‘tgan mavsumda 70 million yevroga baholagandi. O‘shanda unga «Chelsi», «Liverpul» va «Real» qiziqish bildirgan.
Den-Aksel Zagadu (Fransiya) - 19 yosh
Yaqinda ham «Borussiya» muxlislari Yurgen Klopp davridagi kabi Xummels - Subotich markaziy himoyachilar juftligi bo‘lmaydi, deb cho‘chishayotgandi. Ayni paytda dortmundliklar markaziy himoyasida ikki nafar fransiyalik futbolchi to‘p surmoqda. Ularning umumiy yoshi 40ni tashkil qiladi.
«Monako» tarbiyalanuvchisi Abdu Diallo «Borussiya»ga «Mayns»dagi bir mavsumdan so‘ng qo‘shildi. Ayni payt u 22 yoshda. Hamyurti Zagadu esa undan uch yosh kichik. Den-Aksel hozirdanoq kuchli. U o‘tgan yili «PSJ»dan ozod agent sifatida tashrif buyurgandi. Hozir Parijdagilar afsuslanib o‘tirgan bo‘lsalar, ajab emas.
Yakob Larsen (Daniya) - 20 yosh
Hakimi «Real» haqida Larsen bilan gaplashishi mumkin. Bu yigit «Qirollik klubi»da o‘ynashni orzu qiladi. Yakob Dortmund klubi akademiyasida to‘rt yil oldin paydo bo‘lgandi. U jamoa bilan 17 yoshlilar o‘rtasidagi Germaniya chempionatida zafar quchgan. Lekin kattalar futboliga o‘tganidan so‘ng muammolarga duch keldi. O‘tgan mavsum o‘rtasida «Borussiya» Larsenni «Shtutgart»ga ijaraga berib yubordi. U yerda futbolchi to‘rt marta maydonga tushdi, xolos. Umuman olganda, Yakobning joriy mavsumdagi yorqin o‘yini kutilmagan hol bo‘ldi. Daniyalik vinger asosiy tarkib o‘yinchilaridan biriga aylanib bormoqda.
Ashraf Hakimi (Marokash) - 19 yosh
Hakimi hamon Madridning «Real» klubiga tegishli. Umuman olganda, Ashrafning orzusi madridliklarning asosiy o‘yinchisi bo‘lish. «Atletiko»ga qarshi bahsda marokashlik futbolchi uchta golga assistentlik qildi. 2006 yildan buyon, ya’ni sakkiz yoshidan beri «Real»da faoliyat olib boradigan futbolchi Madridning ikkinchi jamoasiga qarshi qanday o‘ynash kerakligini yaxshi biladi. O‘tgan mavsum Zidan Hakimini asosiy tarkibda maydonga tushirardi. U 17ta uchrashuvda ishtirok etib, 2ta gol urishga ham erishgan. Shuningdek, Ashraf «Qirollik klubi» safida Chempionlar Ligasida ham zafar quchgan. Shubhasiz, «Borussiya» safiga qo‘shilish iqtidorli futbolchi uchun foydali bo‘ldi. Mavsumni zaxira o‘rindig‘ida boshlagan Ashraf oktyabr o‘rtalariga kelib asosiy tarkibda muqim tusha boshladi. Uning ustunlik taraflaridan biri - ikki qanotda ham bir xil o‘yin namoyish qila oladi.
Jeydon Sancho (Angliya) - 18 yosh
Sancho Yevropada mavsum kashfiyoti bo‘lishi mumkin. Ushbu yarim himoyachi «Borussiya» safida mavsumni ajoyib tarzda boshladi. Umuman olganda, u tarixga kirishga ham ulgurdi. Ya’ni YECHLda nemis klubi safida gol urgan dastlabki angliyalik futbolchiga aylandi. Sancho «Uotford» tarbiyalanuvchisi hisoblanadi. Keyinchalik «Manchester Siti»ga yo‘l olgan. Ammo «shaharliklar» «briliant»ni qo‘llarida ushlab qola olishmadi. O‘tgan yozda Jeydon «Siti» bilan yangi shartnoma imzolashni istamadi. Vaholanki, unga yaxshi sharoitlar taklif qilingandi. Natijada Dortmundga yo‘l oldi. 2017|2018 yillar mavsumida Sancho «Borussiya» safida bir qator o‘yinlarda maydonga tushdi. Debyut golini urdi va 4ta golga hammualliflik qildi. Jamoaga Lyusyen Favr kelganidan so‘ng angliyalik yosh futbolchiga bo‘lgan ishonch ortdi.
MUHAMMADSODIQ tayyorladi
