O‘zbekistondagi futbol muxlislari bilan yanada yaqin bo‘lish, mamlakatning istalgan chekkasidagi fuqarolar bilan jonli muloqot qilish, ularning fikr va mulohazalarini tinglash, takliflariga quloq tutish  maqsadida O‘zbekiston Futbol Assosiasiyasi 1-vise-prezidenti Umid Ahmadjonovning qabulxonasi ochilganligi haqida avval xabar berib o‘tgandik.

Har haftaning chorshanba kuni soat 11:00dan 17:00ga qadar O‘zbekistondagi futbol muxlislari qabulxonaga tashrif buyurib, o‘zini qiziqtirgan mavzuda O‘FA 1-vise-prezidentiga murojaat qilib bormoqda.

Jumladan, qabulxonaga tashrif buyurgan Berdiyev Maxmayusuf, Xusanov Shoxalil, Akbarov Laziz, Imamov Yusufjonlar O‘zbekistonda futbolni rivojlantirish, bolalar futbolida amalga oshirilishi kerak bo‘lgan chora-tadbirlar haqida o‘z takliflarini bildirib o‘tdi. Bu boradagi o‘zlarining rejalari bilan o‘rtoqlashishdi. Umarov Rashid esa futbolchilarning mashg‘ulotlar jarayonida trenajyordan to‘laqonli foydalanishlari borasida taklif bilan chiqdi.

Umid Ahmadjonov qabulxonaga tashrif buyurgan har bir insonning murojaatini tinglab, o‘sha murojaat bo‘yicha tegishli chora-tadbirlar ko‘rilishini shaxsan nazorat qilib boryapti. Bu orqali esa futbolimizda uchrayotgan muammolar, kamchiliklar bartaraf etilib, futbolimizni yanada rivojlantirish, xolislik va shaffoflikni ta’minlash sari katta qadam tashlanmoqda.