9-11 noyabr kunlari poytaxtimiz yana bir nufuzli musobaqaga mezbonlik qiladi. Ertaga Toshkentdagi «O‘zbekiston» sport majmuasida dzyudo bo‘yicha Gran-Pri musobaqasi start oladi. Ushbu nufuzli turnirda jahonning 47 mamlakatidan 350 nafarga yaqin sportchi ishtirok etishi kutilmoqda.
Qayd etish lozimki, mazkur turnir Olimpiya o‘yinlari lisenziyasi uchun muhim bo‘lgan reyting ochkolarini taqdim etadi.
Musobaqada birinchi o‘rinni qo‘lga kiritgan sportchilar reyting ochkolarini ishlab olish bilan birgalikda, 3000 AQSH dollari miqdoridagi mukofot puliga ham ega bo‘ladilar (Sportchi 2400 AQSH dollarini qo‘lga kiritsa, uning murabbiyiga 600 AQSH dollari taqdim etiladi). Kumush medalga sazovor bo‘lgan sportchi 2000 AQSH dollari (sportchiga 1600 AQSH dollari, murabbiyga 400 AQSH dollari), bronza medaliga ega chiqqan polvonlar esa 1000 AQSH dollari (sportchiga 800 AQSH dollari, murabbiyga 200 AQSH dollari) bilan mukofotlanadilar.
Bugun ushbu musobaqaga qur’a tashlash marosimi o‘tkazildi. Asosiy bahslarga ertaga start beriladi. Barchani «O‘zbekiston» sport majmuasiga taklif etib qolamiz.
