"Real" himoyachisi Alvaro Odriosola Ispaniya chempionatining 12-turida "Selta" ustidan qozonilgan g‘alabadan so‘ng (4:2) fikrlari bilan o‘rtoqlashdi.
"Terma jamoalar o‘yinlari uchun tanaffus oldidan juda yaxshi hissiyotlarga ega bo‘lib oldik, chunki vazifamizni bajardik. "Selta" - qiyin raqib, ularning qarshi hujumlari zo‘r. Natijalar va murabbiy iste’fosi tufayli o‘tgan hafta og‘ir keldi. Ammo asta-sekin o‘zimizga bo‘lgan ishonchimizni qaytaryapmiz, bir jamoa kanimizni ko‘rsatishimiz kerak.
Solari effekti? Futbolda tushuntirib bo‘lmaydigan narsalar ko‘p. Biz murabbiyni qo‘llab-quvvatlaymiz, o‘zimizga ishonchni orttiryapmiz. Asosiysi g‘alaba qozonyapmiz", - deydi Odriosola.
