«Andijon» klubi ikki yillik tanaffusdan so‘ng yana kuchlilar safiga qaytdi. Ildar Sakayev shogirdlari Pro-liga yakunlanishiga bir tur qolganda Superliga yo‘llanmasini naqd qilishdi.

Andijonliklar chempionlik o‘yinida Farg‘onaning «Istiqlol» jamoasi ustidan irodali g‘alabaga erishishdi - 2:1. PFL ahamiyati yuqori bo‘lgan mazkur bellashuvni boshqarishni FIFA referisi Sherzod Qosimovga ishonib topshirgandi.

Lekin ikkinchi bo‘limda Ravshan Ermatovning shogirdiga yetarlicha e’tirozlar bo‘ldi. Biz Andijondagi o‘yindan so‘ng «Istiqlol» futbolchilari bilan suhbatlashdik.

Ularning aksariyati hakam chiqargan qarorlardan norozi ekanliklarini bildirishdi. Lekin o‘sha paytda ulardan faqat Sardor Telyakov(suratda 22-raqamda)gina intervyu berishga rozi bo‘ldi. 

- Juda alamli mag‘lubiyatga uchradik, - deya so‘z boshladi «Istiqlol» markaziy yarim himoyachisi. - Butun uchrashuv davomida tashabbusga aynan biz erishdik, deb o‘ylayman. Darvozabonimiz maydondan chetlatilguniga qadar o‘yinni o‘z nazoratimiz ostida ushlab turgandik. Bu bellashuv qiyin kechishini oldindan bilganimiz uchun tayyorgarlik ham boshqacha bo‘lgandi. Superligaga chiqish imkoniyati bizda ham saqlanib qolgandi. Shu sababli ham maydonga faqat g‘alaba ilinjida tushgandik. Ta’bir joiz bo‘lsa, raqibdan bir bosh baland edik. Kim kuchli ekanligini muxlislar ham ko‘rishdi. Hattoki, ayrim andijonlik ishqibozlar ham jamoamizni olqishlashdi. Bizni qo‘llab-quvvatlash uchun Farg‘onadan ko‘plab muxlislar kelishgandi. To‘g‘risi, ularga chin ko‘ngildan achindim. Biz mag‘lubiyatga loyiq emasdik. Hakamlar o‘yinni «sindirishdi». Katta bayramga tayyorlangan «Andijon»ning kayfiyatini buzishni istashmadi, shekilli. Ular uchrashuvning borishi va yakuniy natijaga ta’sir o‘tkazishdi. Fikrimni uchrashuvni tomosha qilganlar tasdiqlashlari mumkin.

- Murabbiylar tomonidan birinchi bo‘limga qanday taktika tanlangandi?

- Asosiy e’tiborni himoyaga qaratib, yuzaga keltirilgan kichik imkoniyatdan maksimal darajada foydalanishimiz kerakligi aytilgandi. Amalda ham shunday bo‘ldi. Qarshi hujumdan so‘ng mezbonlar darvozasini ishg‘ol qildik. Himoyada bexato o‘ynaganimiz uchun «Andijon» futbolchilari jarima maydonchamiz ichida hech narsa qila olishmadi. Biz jamoaviy o‘yin ko‘rsatdik.

- Tanaffus chog‘ida murabbiylar nima deyishdi?

- Ikkinchi bo‘limda ham xuddi birinchisida bo‘lgani kabi himoyada ko‘proq o‘ynashimiz kerakligini uqtirishdi. Ammo vaziyat umuman o‘zgarib ketdi. Juda oddiy vaziyatda darvozabonimizga ikkita sariq kartochka ko‘rsatildi va buning natijasida maydonda bir kishi kam bo‘lib qoldik. Har bitta to‘qnashuvdan keyin hushtak chalinib, futbolchilarimizga sariq kartochka ko‘rsatildi. Hakamlar bizga o‘ynash imkoniyatini berishmadi.

- Ikkinchi bo‘limda g‘alabani saqlab qolish uchun intilgandek bo‘ldinglar. To‘g‘rimi?

- Ochig‘ini aytaman, niyatimiz bunday emasdi. Chunki himoyaga yotib olsak, raqib bizni ayovsiz jazolashini bilardik. Shu sababli ham «Andijon» futbolchilarini maydon markazidayoq kutib olishga va zararsizlantirishga e’tibor qaratdik. Qarshi hujumda hech bo‘lmasa bitta imkoniyat yuzaga kelishiga umid qilgandik.

- Stadiondagi atmosfera, ya’ni muhit haqida nima deya olasiz?

- Ikkala jamoa muxlislari ham ajoyib tarzda futbolchilarni qo‘llab-quvvatlab turishdi. «Andijon» klubi mutasaddilari ham chempionlik o‘yiniga har tomonlama tayyorgarlik ko‘rishgan ekan. Afsuski, muxlislarimizga g‘alaba tortiq eta olmadik. Lekin ular stadionni yomon kayfiyatda tark etishmadi. Bu bilan biz ko‘rsatgan o‘yindan xafa bo‘lishmadi, demoqchiman. Tabiiyki, hakamlar qaroridan yaxshigina ranjishdi. Shu o‘rinda Farg‘ona, Qo‘qon va hatto Namangandan bizga muxlislik qilish maqsadida yetib kelgan barchaga jamoamiz nomidan rahmat aytmoqchiman.

- «Istiqlol» so‘nggi tur natijasidan qat’iy nazar mavsumni uchinchi o‘rinda yakunlaydi. Nima deb o‘ylaysiz, bu pog‘ona jamoangiz uchun munosibmi?

- Bir tomondan, yaxshi o‘ynab yutqazdik. Qaysidir ma’noda bundan xafa bo‘lmadik. Lekin hakamlar sabab mag‘lubiyatga uchraganimiz hamon alam qilyapti. Kuchli o‘ynab yutqazish ham mardlik belgisi ekan.

- Taqqoslaydigan bo‘lsak, joriy mavsum «Andijon» kuchli ko‘rindimi yoki «Istiqlol»?

- Butun mavsum bo‘yicha oladigan bo‘lsak, baribir «Istiqlol» kuchlidek ko‘rinyapti. Buni ushbu jamoa a’zosi bo‘lganim uchun aytmayapman. Shunchaki, biz birinchi davra uchrashuvida ham «Andijon»ni mag‘lub etgandik. O‘sha uchrashuvda andijonlik futbolchilar hech narsa qila olishmagandi. Andijondagi o‘yinda ham biz yaxshiroq ko‘rindik. Bitta nohaq qizil kartochka o‘yin taqdirini hal qilib qo‘ydi.

- Hakamlarning o‘yinga ta’sir o‘tkazishi mumkinligi haqida murabbiylar sizlarni ogohlantirishganmidi? «Provokasiya»ga berilmanglar, deyishmaganmidi?

- Murabbiylar hakamning xatti-harakatiga e’tibor bermanglar, o‘z o‘yininglarni ko‘rsatinglar, deb uqtirishgandi. Telefonda muxlislar tomonidan olingan videolar ham ijtimoiy tarmoqlarga chiqib ketdi. U yerda nima bo‘lganini hamma ko‘rdi. Shu bois, bu mavzuga ortiq to‘xtalish niyatim yo‘q. Bizda o‘tish o‘yinlarida qatnashish imkoniyati bor. Shunday ekan, kurashishda davom etamiz.