Xo‘sh, Janubiy Koreya darvozamizga 4 ta gol urdi. Bu dahshat, o‘rtoqlar! Ammo masalaning boshqa tarafi ham bor. Avval ham aytganimdek, Kuperdan dekabrga qadar hech narsa kutmagandim, u sehrgar emas, u hamma qatori oddiy inson, tajribali murabbiy.

Masalan, o‘zi o‘ynagan 6 ta o‘rtoqlik o‘yinini yutib, Osiyo kubogida sharmanda bo‘lganidan ko‘ra, o‘rtoqlik o‘yinlarining hammasida tarsaki yeb, rasmiy turnirga chiqargan xulosasi bilan tayyorgarlik ko‘rgani ming marta yaxshiroq.

Kuper O‘zbekiston futboli nima degan savolga endi javob bera oladi. Kuper futbolchilarimizni endi taniydi, imkoniyatlarini chamalay oladi. Livanlar bilan qanday durang o‘ynashimizni, Qatarni nega doim yutganmiz-u, Koreya bilan farqimiz nega bu qadar katta ekanini tushunadi. O‘zbekistonga xush kelibsan, mister Kuper!

Mana endi shu jamoa, shu imkoniyat va shu futbolchilar bilan, ya’ni, bor masalliq bilan mazali taom tayyorlash kerak bo‘ladi.

Uning qanday oshpaz ekanligini Osiyo kubogi ko‘rsatib beradi. U bungacha o‘tgan 3 ta yig‘inga turli futbolchilarni chaqirdi. Endi esa Osiyo kubogiga boradiganlarni saralab, dekabrni ularga bag‘ishlaydi. Bir oy izlanadi, kechalari uxlamaydi, tushlariga Koreya va Yaponiya kirib, uni qo‘rqitsa ham ajab emas. Muhimi, rostakamiga ish boshlaydi. Birlamchi xulosani Osiyo kubogidan keyin chiqarish mumkin bo‘ladi.

O‘tgan 3 oyga esa achinmang. Yangi tanishgan insoningiz aslida kim ekanini bilish uchun ham vaqt kerak. Kuper ham biz bilan, futbolimiz bilan tanishdi. Dardini bildi, tashhis qo‘ydi. Davolay oladimi yoki yo‘q boshqa masala. Uning qanday shifokor ekanini Osiyo kubogi aniqlab beradi.

Diyor Imomxo‘jayev