Avval xabar qilinganidek, bugun yurtimizdagi 14ta hududiy bolalar va o‘smirlar futbol akademiyalari o‘rtasida "O‘FA Kubogi" musobaqasi finali bo‘lib o‘tdi.
Finalda Andijon jamoasi Sirdaryo jamoasiga qarshi maydonga tushib, 3:1 hisobida g‘alaba qozondi. 3-o‘rin uchun bahsda Namangan jamoasi Navoiyni kichik hisobda yengdi.
Shu tariqa Andijon jamoasi birinchi o‘rinni qo‘lga kiritgan bo‘lsa, Sirdaryo ikkinchi, Namangan uchinchi o‘rin sohibiga aylanishdi.
G‘oliblarni taqdirlash marosimida O‘FA bosh kotibi Sardor Rahmatullayev, Respublika bolalar va o‘smirlar akademiyasi direktori Grigoriy Ayrapetov, o‘smirlar va yoshlar terma jamoalari bosh murabbiylari Azamat Abduraimov va Otabek G‘ulomxo‘jayevlar qatnashishdi.
G‘oliblarga O‘FA tomonidan Kubok, diplomlar va boshqa qimmatbaho sovg‘alar topshirildi.