Professional futbol ligasining stadionlarni tekshirish komissiyasi 21 noyabr kuni Qo‘qonga borib, «Qo‘qon-1912» klubi stadionini tekshirdi.
PFL xabariga ko‘ra, «Qo‘qon-1912» klubining uy stadioni maysasi PFL talablariga javob bermaydi. Tashkilot yil davomida klubni ogohlantirib kelganiga qaramay, bu borada biror ish olib borilmagan.
Agar klub stadioni maysasi bo‘yicha dekabr oyida ish boshlamasa va har 10 kunda PFLga hisobot topshirmasa, Superliga o‘yinlariga qo‘yilmaydi. Ish boshlangan taqdirda, jamoa Superligadagi ishtirokini shartli ravishda davom ettirishi mumkin bo‘ladi.
2019 yilgi mavsumda Superliga va Pro-liga klublari o‘z akademiyasini ishga tushirishi shart. Busiz klublar musobaqaga qo‘yilmaydi. Eng kamida futbol klublari akademiya uchun ajratiladigan yillik smetani taqdim etishi va smeta bo‘yicha pullar bolalar futboliga yo‘naltirilganini isbotlab berishi lozim.
Lisenziyalash talabidan kelib chiqib, futbol klublari birinchi navbatda infratuzilmaga e’tibor qaratishi lozim. Shundan keyin asosiy tarkib uchun futbolchilarni jalb qiladi. Yuqoridagi masalalar bo‘yicha ish boshlanmay turib, «Qo‘qon-1912» klubiga yangi futbolchilarni ro‘yxatdan o‘tkazish man etildi.
