Профессионал футбол лигасининг стадионларни текшириш комиссияси 21 ноябрь куни Қўқонга бориб, «Қўқон-1912» клуби стадионини текширди.
ПФЛ хабарига кўра, «Қўқон-1912» клубининг уй стадиони майсаси ПФЛ талабларига жавоб бермайди. Ташкилот йил давомида клубни огоҳлантириб келганига қарамай, бу борада бирор иш олиб борилмаган.
Агар клуб стадиони майсаси бўйича декабрь ойида иш бошламаса ва ҳар 10 кунда ПФЛга ҳисобот топширмаса, Суперлига ўйинларига қўйилмайди. Иш бошланган тақдирда, жамоа Суперлигадаги иштирокини шартли равишда давом эттириши мумкин бўлади.
2019 йилги мавсумда Суперлига ва Про-лига клублари ўз академиясини ишга тушириши шарт. Бусиз клублар мусобақага қўйилмайди. Энг камида футбол клублари академия учун ажратиладиган йиллик сметани тақдим этиши ва смета бўйича пуллар болалар футболига йўналтирилганини исботлаб бериши лозим.
Лицензиялаш талабидан келиб чиқиб, футбол клублари биринчи навбатда инфратузилмага эътибор қаратиши лозим. Шундан кейин асосий таркиб учун футболчиларни жалб қилади. Юқоридаги масалалар бўйича иш бошланмай туриб, «Қўқон-1912» клубига янги футболчиларни рўйхатдан ўтказиш ман этилди.
