Sir emaski, boks Olimpiya o‘yinlarida O‘zbekiston uchun medal taqdim etuvchi eng asosiy sport turi hisoblanadi. 2016 yilgi Olimpiya o‘yinlarida ham boks bo‘yicha O‘zbekiston terma jamoasi a’zolari 3 ta oltin, 2 ta kumush va 2 ta bronza medallarini qo‘lga kiritgan holda umumjamoa hisobida birinchi o‘rinni egallagandilar. Endi bokschilarimiz oldida yanada mas’uliyatli vazifa turibdi. Ular ushbu natijani kamida takrorlashlari lozim bo‘ladi. Bu esa oson bo‘lmasligi tabiiy. Chunki, 2020 yilgi Olimpiya o‘yinlarining boks bo‘yicha bellashuvlarda vazn toifalari kamaytiriladi. Bungacha 10 ta vaznda bahslar tashkil etilgan bo‘lsa, Tokio Olimpiadasida 8 ta vaznda bahslar o‘tkaziladi.

Bugun Milliy olimpiya qo‘mitasida O‘zbekiston boks federasiyasi mas’ullari bilan yig‘ilish tashkil qilindi. Uchrashuvni Bosh kotib Jasur Matchanov olib bordi. O‘tkazilgan yig‘ilishda bokschilarimizni Tokio Olimpiya o‘yinlarida munosib ishtirok etishlarini ta’minlash maqsadida ishlab chiqilgan strategiya muhokama qilindi. Federasiya vakillari bu bo‘yicha o‘z rejalarini, maqsad va vazifalarini tushuntirib berdilar.

Eslatib o‘tamiz, kecha O‘zbekiston yengil atletika federasiyasi mutasaddilari bilan ana shunday yig‘ilish tashkil etilgandi. Rejaga ko‘ra, Milliy olimpiya qo‘mitasida barcha olimpiya sport turlari federasiya va assosiasiyalari bilan ana shunday muhokamalar bo‘lib o‘tadi. Zero, Yaponiya mezbonlik qiladigan Olimpiya o‘yinlarida muvaffaqiyatli ishtirok etish bugungi kunda MOQ oldiga qo‘yilgan eng dolzarb vazifadir.