Pepsi Superliga 32-turi doirasida Namanganning “Navbahor” klubi o‘z maydonida Toshkentning “Lokomotiv” jamoasini qabul qiladi. Mazkur o‘yin uchun chiqarilgan chiptalar bugundan sotuvga chiqdi.
Sevimli jamoamiz ishqibozlari 4, 5, 6, 7, 8, 9, 14, 15, 16, 17, 18 va
19-sektorlar uchun 15 ming, 2, 3, 10, 11, 12, 13, 20 hamda 21-sektorlar uchun
20 ming so‘mdan chipta xarid qilishlari mumkin.
“Navbahor”–“Lokomotiv” klublari o‘rtasidagi uchrashuvdan oldin viloyatimizning taniqli xonandalari tomoshabinlarga o‘zlarining dilrabo kuy-qo‘shiqlari bilan zavq ulashishadi.
Mazkur o‘yin joriy mavsumning so‘nggi bahsi bo‘lishdan tashqari, “temiryo‘lchilar” Namanganga chempion sifatida tashrif buyurishsa, “lochinlar” bronza medali sohibi sifatida maydonga tushishadi.
Shunday ekan, “Lokomotiv” bejizga oltin medalni qo‘lga kiritmaganligini isbotlashga urinsa, “Navbahor” Namangandagi mag‘lubiyatsiz seriyasini davom ettirishga harakat qilib, joriy mavsumni ijobiy tarzda yakunlashga intiladi.
Bo‘lajak uchrashuv mazkur omillar sababli ham ancha ahamiyatli.
Chiptalar bugundan boshlab, Namangan shahridagi “Markaziy” o‘yingoh, “Sardoba” bozori, shuningdek, “Isparxon” Supermarketi hududlarida sotilmoqda. Chiptalar miqdori cheklangan. Ularni tezroq xarid qilishga shoshiling!
“Navbahor” – “Lokomotiv” o‘yini 30 noyabr kuni soat 16:00 da start oladi.
Joriy mavsumning so‘nggi bahsiga tashrif buyuring va sevimli jamoangiz - “Navbahor”ni qo‘llab-quvvatlang hamda g‘alabasiga madadkor bo‘ling, aziz futbol muxlislari!
“Navbahor” PFK matbuot xizmati.
