Kecha "Chig‘atoy" maydonida U18 jamoalari o‘rtasidagi Toshkent shahar chempionati so‘nggi turi o‘tkazildi. Qizg‘in murosasiz bahslarga boy o‘tgan chempionatning so‘nggi turigacha intriga saqlanib qoldi va sovrinli o‘rinlarni qo‘lga kiritgan jamoalar nomi so‘nggi turda aniqlandi.
Musobaqaga yakuniga bir tur qolganida 74 ochko jamg‘argan Sergey Chigodayev shogirdlarining "Chig‘atoy" bilan o‘yinda ochko yo‘qotishgga haqqi yo‘q edi. Sababi "Traktor" hamda "Lokomtiv-1" jamoalari bir xil 72 ochko bilan "Bunyodkor-U18"ning ochko yo‘qotishidan umidvor edi.
Lekin "Chig‘atoy" bilan o‘yinda yoshlarimiz o‘zlariga kerakli natijani qayd etishdi va yakunda Toshkent shahar chempionligini qo‘lga kiritishdi. Birinchi bo‘lim yakuni arafasida Otabek Jo‘raqo‘ziyev tomonidan kiritilgan gol "Bunyodkor"ga g‘alabani taqdim etdi. O‘yinning ikkinchi bo‘limida hakam tomonidan belgilangan penaltini darvozabonimiz Mo‘min Qodirov mohirlik bilan qaytarib, g‘alabaga o‘z hissasini qo‘shganini alohida ta’kidlab o‘tish joiz.
Shu tariqa Sergey Chigodayev shogirdlari Toshkent shahri chempionligini qo‘lga kiritishdi.
