O‘zbekiston futbol assosiasiyasi tomonidan yurtimizda bolalar futbolini rivojlantirish, hududiy bolalar va o‘smirlar futbol akademiyalari faoliyatini xorij tajribasini o‘rgangan holda muvofiqlashtirish bo‘yicha bir qator chora-tadbirlar amalga oshirilmoqda.

Jumladan, 15-16 dekabr kunlari O‘FA Xalqaro aloqalar boshqarmasi vakillari Italiyaning Milan shahriga tashrif buyurib, "Inter" klubi va akademiyasi rahbariyati bilan uchrashuv o‘tkazgani haqida avval xabar berib o‘tgandik.

Bugun 18 dekabr kuni yurtimizga tashrif buyurgan "Yuventus" klubi brendni rivojlantirish bo‘yicha ijrochi direktori Karolina Kiappero va "Yuventus" klubi futbol akademiyasi bosh murabbiyi, Yaqin Sharq, Fors Ko‘rfazi, Shimoliy Afrika va Rossiya bo‘yicha bosh koordinatori Marko Degortes bilan O‘zbekiston futbol assosiasiyasida uchrashuv o‘tkazildi.

Uchrashuv davomida Turin klubi mutasaddilari O‘zbekistonda "Yuventus" klubi akademiyasini ochish va uning faoliyatini yo‘lga qo‘yish masalasini muhokama qilishdi. Shuningdek, bolalar futboli murabbiylari uchun "Yuventus" klubi mutaxassislari ishtirokida mahorat darslarini o‘tkazish bo‘yicha ham fikr almashildi. Kelgusida hamkorlikda amalga oshiriladigan chora-tadbirlar bo‘yicha kelishuvga erishildi.

Shundan so‘ng, "Yuventus" klubi vakillari poytaxtimizdagi "Milliy" stadionga tashrif buyurishdi. U yerda o‘zbek futboli tarixi muzeyi bilan tanishib, stadionda yaratilgan shart-sharoitlar bilan tanishishdi.