Italiyaning “Milan” klubi murabbiy Jennaro Gattuzoga o‘zini ko‘rsatishi uchun dekabr oxiriga qadar imkoniyat berdi.
SportMediaset nashrining ma’lum qilishicha, klub menejmenti Gattuzoni: “Fiorentina”, “Frozinone” va SPAL jamoalariga qarshi o‘yinlarga futbolchilarni qanday tayyorlashini kuzatadi.
Bu o‘yinlar natijasiga qarab, “Milan” Gattuzoni postda qoldirish yoki bo‘shatish bo‘yicha qaror qabul qiladi.
Manbaning aytishiga ko‘ra, Jennaro Gattuzoning o‘rniga Roberto Donadoni va “Arsenal” sobiq murabbiyi Arsen Venger nomzodlari ko‘rib chiqilmoqda.
Eslatib o‘tamiz, “Milan” joriy mavsum Gattuzo qo‘l ostida Yevropa ligasi guruh bosqichidan chiqa olmadi. “Rossoneri”lar hal qiluvchi o‘yinda “Olimpiakos”ga imkoniyatni boy berib qo‘yishgan edi.
Shuningdek, “Milan” A Seriyada ketma-ket ikki o‘yin: “Torino” (0:0) va“Bolonya” (0:0) bilan durang o‘ynadi.
