Yaqinlashib kelayotgan Osiyo kubogini ba’zi yulduzlar ayrim sabablarga ko‘ra o‘tkazib yuborishadi. Shu futbolchilar haqida qisqacha to‘xtalib o‘tamiz.
Shinji Kagava – Yaponiya
Bu futbolchi o‘z vaqtida Osiyoninig eng yaxshilari qatorida yurardi. Aslida, hozir ham shunday, shunchaki, yaponlar bu Osiyo kubogida asosiy kuchni yoshlarga qaratgan holda, Qatardagi Mundialga tayyorgarlikni boshlab yuborishdi. Kagava esa «Borussiya D»bilan chempionlik uchun kurashni davom ettiraveradigan bo‘ldi.
As-Sahlaviy – Saudiya Arabistoni
Haqiqiy gol mashinasini bu Osiyo kubogida ko‘ra olmaymiz. «Sahro burgutlari» bu Osiyo kubogida xuddi Yaponiya singari yo‘l tutishmoqda. Lekin Saudiyada yoshi kattaroq futbolchilar talaygina. Arablar murabbiylarni qo‘lqopdek almashtirishlarini hisobga olsak, o‘z joyini saqlab qolish uchun ham murabbiy natijani ko‘proq birinchi planga olib chiqsa, ajab emas.
Yedinak – Avstraliya
Metindek mustahkam tayanch zonasi vakili bu galgi Osiyo chempionatini o‘tkazib yuboradi. APLdagi ishonchli o‘yinlari va gollari evaziga uni Osiyo qit’asida yaxshi tanishadi. Yedinakni bosh murabbiy yakuniy tarkibga jon deb kirgazmoqchi edi. So‘nggi daqiqalarda Yedinak termadagi faoliyatini yakunlashini e’lon qilib qoldi. Afsuski, bu yigitnnig ham o‘yinlarini ko‘ra olmaymiz.
Kim Shin Vuk – Janubiy Koreya
Baland bo‘y va baquvvat tanasi orqali uzoq plandan ham ko‘rinib turadigan hujumchiga Bentu tarkibda joy topa olmadi. Janubiy Koreya matbuoti ham shu haqida ko‘p bahsli maqolalarni birin-ketin e’lon qilishmoqda. Bu futbolchini yutimiz futbol ixlosmandlari ham yaxshi tanishadi. Afsuski, uni ham Osiyo kubogida o‘rni bilinadi.
Vitaliy Denisov – O‘zbekiston
Vitaliy Denisov – O‘zbekiston
Rossiya chempioniga joy topilmaganiga hamma hayron bo‘lsa, ajab emas. Chunki Vitaliy harakat qiladigan qanotda hozir bizda unga teng keladigani bo‘lmasa kerak. Uning eng qiyin daqiqalardagi motivatorlik xususiyatlari ham jamoamizga qo‘l kelishi mumkin edi. Afsuski, termamiz murabbiyi haqiqiy jangchini Osiyo kubogiga olib ketmaydigan bo‘ldi. Ishqilib, oxiri baxayr bo‘lsinda, aks holda toshoynalarninig sho‘ri quriydi.
Ya. U.
