Ajoyib fakt, Italiyaning «Inter» klubi joriy mavsum chamasi 25 foiz golini o‘yinning 86-daqiqasidan keyin urmoqda. Deylik, chempionatning 18-turidan o‘rin olgan «Inter» - «Napoli» o‘yinida «qaynoq»lik yuqori darajaga ko‘tarildi. Hakamning start hushtagi chalinishi bilan Mauro Ikardi maydon markazidan zarba yo‘llab, darvoza to‘sinini nishonga oldi. Oxirgi 10 daqiqalikda esa futbolchilar shunchaki, talvasaga tushishdi. Bu oraliqda darvozabonlar o‘z jamoalarini muqarrar gollardan saqlab qolishdi, shuningdek, bir vaziyatda «Inter» himoyachisi to‘pni shundoq chiziq ustidan qaytardi. Kalidu Kulibali esa hakamga istehzoli qarsak chalgani uchun «qizil»ga mubtalo bo‘ldi. Keyin Lautaro Martinesning hal qiluvchi goli yuzaga keldi - 90-daqiqada berilgan aniq zarba 3 ochkoni mezbonlar tomon «yumalatdi».

Umuman, oxirgi daqiqalardagi hamla «Inter»ning joriy mavsumdagi asosiy quroliga aylanib qoldi.

«Inter» «A» seriyasining 19ta turi va Yevropa CHL guruh bosqichida jami 37ta gol urgan bo‘lsa, shundan 9tasi o‘yinlarning 86-daqiqasidan keyingi vaqtga to‘g‘ri keldi. Boshqacha aytganda, «neradzurralar» hisobidagi jami gollardan deyarli 25 foizi oxirgi hamla samarasidir.

So‘nggi daqiqalarda urilgan 9ta goldan 6tasi o‘yin natijasini o‘zgartirdi. Faqat Matteo Politano («Kalyari» darvozasiga), Joao Mario va Raja Nainggolan («Jenoa» darvozasiga) tomonidan urilgan gollar hech nimaga ta’sir o‘tkazgani yo‘q.

Agar 86-daqiqadan keyin urilgan gollarni hisobdan chiqarsak, «Inter» CHLda  oxirgi turga qadar «pley-off» bosqichiga chiqish uchun kurasholmasdi, milliy chempionatda esa 3-o‘rin emas, 5-pog‘onada turardi.