Angliya liga kubogi yarim final bosqichi doirasida dastlabki o‘yin bo‘lib o‘tdi. «Tottenxem» o‘z maydonida «Chelsi»ni qabul qilib, kichik hisobda g‘alaba qozondi.
Uchrashuvning 25-daqiqasida to‘p oldinga uzatilgan paytda himoyachilar bilan deyarli bitta chiziqda turgan Keyn darvozabon bilan birga-bir vaziyatga chiqib ketdi. «Chelsi» darvozaboni Kepa Arrisabalaga esa jarima maydonchasi ichida «Tottenxem» hujumchisini yiqitdi. O‘yin bosh hakami Maykl Oliver dastlab ofsaydni qayd etdi. Ammo videotakrorni ko‘rganidan so‘ng o‘z qarorini o‘zgartirdi va mehmonlar darvozasi tomon penalti belgiladi.
Sarri shogirdlarining hakamga e’tirozi shunda bo‘ldiki, laynsmen bayroqchani ko‘targani uchun markaziy himoyachilar tezlikni pasaytirishgandi.
"Shporlar" sardori 11 metrli jarima zarbasidan samarali foydalandi.
Ma’lumot o‘rnida. Ushbu mavsumdan boshlab Angliya liga kubogi musobaqasida VAR tizimidan foydalanilmoqda. Angliya premyer-ligasida esa bu tizim 2019/2020 yilgi mavsumdan boshlab joriy qilinadi.
