O‘zbekiston milliy terma jamoasi bosh murabbiyi Ektor Kuper Ummonga qarshi kechgan va 2:1 hisobida yakuniga yetgan g‘alabadan so‘ng matbuot anjumanida ishtirok etdi.
-Biz bu o‘yinni juda kutgan edik va unda ikki xil bo‘lim o‘tkazdik. Birinchi bo‘limda yaxshiroq o‘ynadik, ammo ikkinchi bo‘limni raqib kuchliroq boshladi. Ular to‘pni nazorat qildi. O‘tkazilgan javob golidan so‘ng esa yana hisobda oldinga chiqa oldik.
-O‘yinni xavotir bilan tomosha qildik. Ikkinchi bo‘limda omad va futbolchilarning individual jihati evaziga g‘alaba qozonishga muvaffaq bo‘ldik. Ikkinchi bo‘limni chuqur himoyada boshlash murabbiyning rejasimidi?
-Yo‘q, bu mening rejam emas edi. Biz to‘pni ko‘proq nazorat qilib, ko‘proq zarba yo‘llashimiz kerak edi. Ammo Ummon juda yaxshi o‘yin namoyish qildi va himoyani ushlashga majbur bo‘ldik. Mening maqsadim boshqa - to‘pni nazorat qilish edi. Ammo hammasi raqibning o‘yiniga bog‘liq bo‘lib qoldi.
-Musobaqa endi boshlandi, ammo futbolchilarda charchoq alomatlari bordek. Bunga qanday qaraysiz?
-Yo‘q, futbolchilarda charchoq alomatlari yo‘q. Shunchaki ba’zi muammolar ko‘zga tashlandi. Bu charchoq emas, balki asabiylik. Futbolchilar asablarini jilovlay olishda muammolarga duch keldi.
-Pozision hujum juda kam bo‘ldi. Birinchi gol jarimadan, ikkinchisi esa individual mahorat evaziga urildi. So‘ramoqchi bo‘lganim, Bikmayev va Sidiqovning o‘yini borasida nima deya olasiz?
-Men individual o‘yin bo‘ldi, deb ayta olmayman. Butun jamoa kurash olib bordi. Biz shunchaki butun zonalarni yopa olmadik. Shuning ortidan muammolar yuzaga keldi.
