Akmal Eshonxonov
Dubaydan maxsus
Bugun, 12 yanvar kuni O‘zbekiston hamda Turkmaniston terma jamoalarining “F” guruhidagi o‘zaro o‘yini oldidan Dubaydagi “Rashid Stadium” stadionida har ikki jamoa vakillari bilan matbuot anjumani tashkil etildi.
Anjumanning birinchi qismida O‘zbekiston terma jamoasi bosh murabbiyi Ektor Kuper jiddiy o‘yin oldidan o‘z fikrlarini bildirib o‘tdi.
“Ha, o‘yinga jiddiy tayyorgarlik ko‘ryapmiz. Turkmaniston yaxshi shakllangan jamoa. Ularning Yaponiyaga qarshi o‘yinini tomosha qildim. Turkmanistonga qarshi faqat g‘alaba uchun maydonga tushamiz. Ummonga qarshi o‘yinni hamma turlicha tahlil qildi.
Muhimi biz o‘sha o‘yinda g‘alaba qozondik. Ummon – kuchli terma jamoa. Ular Fors Ko‘rfazi musobaqasida g‘alaba qozonishdi. Shu sabab Ummonni mag‘lub etganimizdan xursandmiz. Turkmanistonga qarshi o‘yinda atolarimizni to‘g‘irlab, chiroyli o‘yin namoyish qilishga harakat qilamiz.
Turkmanistonning ustunliklari haqida gapiradigan bo‘lsak, ular tartibli jamoa. Yaponiyaga qarshi o‘yinda ular tartibli harakat qilishdi, lekin ularga tajriba yetishmadi. Ertaga maydonga tushadigan har ikki terma jamoaning o‘z o‘yin uslubi bor. Kim kuchliroq ekanini maydondagi o‘yin ko‘rsatadi.
Krimes qizil kartochka tufayli o‘yinni o‘tkazib yuboradi. Ammo bizda uning o‘rniga maydonga tushishi mumkin bo‘lgan ikki nafar futbolchi bor. Ulardan qaysi biri o‘sha paytda yaxshiroq formada bo‘lsa, o‘sha futbolchi asosiy tarkibda maydonga tushadi.
Turkmaniston terma jamoasi himoyasida o‘ziga yarasha muammolar bor. Biz ertaga ana shu muammolardan foydalanib hujum tashkil qilishga va raqib darvozasini ishg‘ol qilishga urinamiz. Misr terma jamoasida ishlaganimda boshqacha uslubda to‘p surganmiz.
O‘zbekiston bilan boshqacha uslubni shakllantiryapmiz. Ba’zi o‘xshashliklar bo‘lishi mumkin, lekin bu ikki mamlakat futboli boshqa-boshqaa. Albatta, ertaga muxlislarga va jurnalistlarga yoqadigan o‘yin namoyish qilib, g‘alaba qozonishga harakat qilamiz.
Eslatib o‘tamiz, Uchrashuv mahalliy BAA vaqti bilan soat 20:00da (Toshkent vaqti bilan soat 21:00da) Dubay shahridagi “Rashid Stadium” o‘yingohida boshlanadi. Uchrashuvda O‘zbekiston oq, Turkmaniston yashil rangli libosda harakat qiladi.
Mazkur bahsni BAA vakili Ammar Al Junaybi boshchiligidagi hakamlar boshqaradi.
